त्रिविया शैक्षिक क्यालेण्डर सार्वजनिक
त्रिभुवन विश्वविद्यालयं ताः ई लिपा थःगु शैक्षिक धलः (क्यालेण्डर) सार्वजनिक याःगु दु । किपू त्रिवि स्थित स्मृति भवनय् विहीवाः ग्वसाःग्वःगु छगू ज्याझ्वःया दथुइ शैक्षिक क्यालेण्डर सार्वजनिक याःगु खः ।
सार्वजनिक धल कथं स्नातक न्हापांगु दँ थ्वहे कात्तिक २८ गतेनिसें २०६९ असार तक्क कक्षा सञ्चालन यानाः साउनया निगूगु वालय् परिक्षा जुइगु व मंसिरय् परीक्षाया लिच्वः पिकाइ । थुकियात आधार तायेकाः मूल्याङ्कन यानाः वइगु दँय् कार्यतालिकायात मूर्तरुप बिइ । अथेहे कार्यतालिका कथं मंसिर ७ गते दीक्षान्त समारोह, फागुन १४ गते विद्यार्थीतय्गु स्ववियु निर्वाचन, फागुन १० गते प्राध्यापक निर्वाचन, फागुन ५ गते कर्मचारी निर्वाचन व पुस १६ निसें खेलकुद गतिविधि याइ ।
वंगु वैशाख ५ गते कार्यतालिका समिति नीस्वनाः थीथी चरणय् विद्यार्थी, नेतात, प्राध्यापक, कर्मचारीतलिसे सहलह यानाः थुगु तालिका निर्माण याःगु खः ।
घोषणा ज्याझ्वःलय् त्रिभुवन विश्वविद्यालयया उपकुलपति प्रा. डा. हिराकाजी महर्जनं अन्तर्राष्ट्रिय स्तरय् नां कमय् यायेधुंकूगु थुगु विश्वविद्यालयया शैक्षिक क्यालेण्डर मदयाः विरोध वयाच्वंगु न्ह्यःथनादिसें कार्यतालिका कथं ज्याझ्वःत लागू यायेत सम्बद्ध पक्षयात निर्देशन बियादिल ।
ज्याझ्वलय् त्रिभुवन विश्वविद्यालयया रेक्टार प्रा. डा. भिम अधिकारीं कार्यतालिका कथं फुक्कसिनं थःत रुपान्तरित यानाः कार्यदक्षताया लिसे टार्जेटयात मिट यायेमाःगु धयादिल ।
उगु ज्याझ्वलय् त्रिभुवन विश्लविद्यालयया पदाधिकारीत, थीथी संकायया प्रमुखत, थीथी क्याम्पसया प्रमुखत, विद्यार्थी, प्राध्यापक व कर्मचारी युनियनया पदाधिकारीतय्गु ब्वति दुगु खः ।
