एमाले संसदीय दलं बिपाया विरोध
नेकपा (एमालें) प्रधानमन्त्री डा. बाबुराम भट्टराई नेतृत्वया सरकारं राजनीतिक प्रतिबद्धता अःखः भारतलिसे दीर्घकालिन महत्वया बिपा सम्झौता याःगु द्वपं बिउगु दु ।
एमाले संसदीय दलया सिंहदरवारय् विहीवाः च्वंगु मुँज्यां बिपा सम्झौता प्रक्रियागत ढंगपाखें हे गलत जूगु दाबी याःगु दु । न्हय्गू बुँदे सहमतिलिपा देशय् राजनीतिक दलतय्गु दथुइ सम्वाद व सहकार्यया अवस्था सिर्जना जूसां नं मन्त्रिपरिषद विस्तार यानाः उकियात नं वर्तमान सरकारं त्वाःथलेगु ज्या याःगु दावी एमालें याःगु दु । मुँज्यां खर्च म्हो यायेगु घोषणा अःखः पीखुम्ह दुजः दुगु मन्त्रिपरिषद नीस्वंगुलिइ च्यूताः प्वंकूगु खः ।
अथेहे एमालें दलत दथुइया सहमति कथं शुक्रवाःया संसद मुँज्याय् अनिवार्य उपस्थित जुइत व संविधान संशोधनया पक्षय् मतदान यायेत थः सभासदतय्त ह्वीप जारी याःगु दु ।
नापं मुँज्यां सहमतिया वातावरण स्यंकेगु कथं सभासद बालकृष्ण ढुंगेलयात आममाफी बिइगु धकाः सरकारं याःगु निर्णय लित कायेत नं माग याःगु दु । एमालें व्यत्ति हत्याया द्वपं लाःम्ह ढुङगेलयात आममाफी बिइगु निर्णय यानाः सरकारं कानुनी राज्यया उपहास यायेगुया लिसलिसे दण्डहिनतायात प्रश्रय बिइगु ज्या याःगु दाबी याःगु दु ।
