सुनसरीइ ट्याक्टर दुर्घटना / झिंच्याम्ह सित, झिंन्हय्म्ह घाःपाः

सुनसरीया भरौल २ स्थित मोरङ-सुनसरी सिँचाई आयोजनाया मू नहरय् विहीवाः सुथय् तिर्थालुत तयाः वंगु ट्याक्टर दुर्घटना जुयाः झिंच्याम्ह मनूत सीगु दु । दुर्घटनाय् झिंन्हय्म्ह घटनास्थलय् हे व छम्ह धरानस्थित विपी कोइराला स्वास्थ्य विज्ञान प्रतिष्ठानय् वासः यायेगु झ्वलय् सीगु खः । सीपिं फुक्क धनुषा जिल्लाया तारापट्टी सिसिर्या गाविस ४ व ५ वडायाःपिं खः ।

दुर्घटनाय् लानाः सुमिन्द्रा मुखिया, सुमित्रा यादव, रिताकुमारी यादव, कुमरदेवी यादव, मन्तोरिया देवी यादव, अम्बिकादेवी यादव, पारो यादव, भुलीदेवी यादव, धर्मराज यादव, फुलकुमारी यादव, शुकलाल यादव, कुमारी यादव घटनास्थलय् हे सीगु खः । अथेहे सुन्तीदेवी यादव, रामराजी देवी यादव, केवलदेवी यादव, तेत्रीदेवी यादव व इज्योनिया यादव नं घटनास्थलय् हे मदुगु खः । उकथं हे दुर्घटनाय् लानाः बांमलाक्क घाःपाः जूम्ह लखनीदेवी यादव विपी कोईराला स्वास्थ्य विज्ञान प्रतिष्ठान धरानय् वासः यायेगु भ्वलय् सीगु खः ।

दुर्घटनाय् लानाः राजदेवी यादव, कौशिल्यादेवी यादव, रुदल यादव, रमिश्री यादवपिं गम्भिर अवस्थाय् विपी प्रतिष्ठान धरानय् भर्ना याकूगु खः । दुर्घटनाय् सामान्य घाःपाः जूपिं झिंच्याम्हसिया जिल्ला अस्पताल इनरुवाय् वासः जुयाच्वंगु पूर्व क्षेत्रीय ट्राफिक प्रहरी ज्याकू इटहरीं जानकारी ब्यूगु दु । ट्याक्टर दुर्घटनाय् लानाः सीपिं झिंखुम्ह मिसा व निम्ह मिजंत खः ।

धनुषापाखें सुनसरीया बराह क्षेत्रय् दर्शन यायेत वनाच्वंपिं दर्शनार्थीत ज्वनाः वःगु ज. १. त. ४५५३ ल्याःया ट्याक्टर विहीवाः सुथय् ५ बजे भरौल २ स्थित नहरय् कुतुंवंगु खः ।

दुर्घटनाया बारे प्राविधिक अध्ययन यायेत समिति
थ्वहे दथुइ यातायात व्यवस्था विभागं छुं दिं दुने थीथी थासय् जूगु मू मू सवारी दुर्घटनाया बारे प्राविधिक अध्ययन यानाः माःगु सुझावलिसे प्रतिवेदन पेश यायेत यातायात व्यवस्था विभागया प्राविधिक निर्देशक प्रेमकुमार सिंहया संयोजकत्वय् छगू समिति नीस्वंगु दु । उगु समितिइ सतक विभागया डिभिजनल इन्जिनियर, ट्राफिक प्रहरी महाशाखाया प्रहरी नायव उपरीक्षक, यातायात व्यवस्था विभागया मेकानिकल इन्जिनियर व विभागया शाखा अधिकृत दुजः कथं दु । समितिं छवाःया दुने यातायात व्यवस्था विभागया महानिर्देशकयात प्रतिवेदन लःल्हाइगु जानकारी श्रम लिसे यातायात व्यवस्था मन्त्रालयं बिउगु दु ।