न्याम्ह कासामिपिं जोर्डन वनीगु
यें (सन्ध्या टाइम्स) / नेपाःया थीथी कासा लिसे सम्बन्धीत न्याम्ह कासामिपिं जोर्डनय् जुइगु छगू क्याम्पय् ब्वति कायेगु निंतिं कन्हय् उखेपाखे वनेत्यंगु दु ।
थ्व हे जून १ तारिख निसें १० तारिख तक जोर्डनया जेनेरेशन फर पीश संस्थाया ग्वसालय् 'खेलकूदया माध्यमं शान्तिया खोजी' नांया उगु क्याम्प जुइत्यंगु खः ।
क्याम्पय् ब्वति कायेगु निंतिं नेपाःया जिमन्याष्टिकपाखें भोगेन्द्र मानन्धर जुडोपाखें रमेश महर्जन बास्केटबलपाखें हेल्गा रायमाझी फुटबलपाखें कुमार थापा व तेक्वान्दोपाखें दिपक विष्टं ब्वति कयादीत्यंगु दु ।
जोर्डनया राजकुमार फेजल अल हुसेनया संयोजकत्वय् जुइगु उगु क्याम्पय् हिंसा गृहयुद्ध द्वन्दं प्रभावित नेपाःया लिसें पाकिस्तान श्रीलंका घाना सेनेगल लगायत एशिया व अफ्रिकाया झिंस्वंगु देया ७३ म्ह कासामिपिंसं ब्वति काइगु खँ सीदुगु दु ।
नेपाल ओलम्पिक कमिटीयात वःगु कोटापाखें अन्तिम छनौट जुयाः थुपिं कासामिपिंसं ब्वति कायेत्यंगु खः ।
