नेपालमण्डल बन्द प्रति थीथी संस्थाया समर्थन

यें (सन्ध्या टाइम्स) / नेवाः स्वायत्त राज्य मंकाः संघर्ष समितिं मुलुकया न्हूगु संविधानय् स्वायत्त राज्यया सुनिश्चितताया माग यासें वइगु जेठ १८ गते आह्वान याःगु नेपालमण्डल बन्द याझ्वःयात राजोपाध्याय समाजं समर्थन याःगु दु । समाजया नायः बदन राजोपाध्यायं प्रेस विज्ञप्ति पितबिसें देशय् संघीय लोकतान्त्रिक गणतन्त्र पलिस्था जुइ धुंकूसां संघीयताया हे विरोध यानाच्वंपिं नं दुगु न्ह्यथनातःगु दु । जातीय व भाषिक आधारय् मखुसें क्षेत्रीय आधारय् संघीयता निर्णय यायेमाःगु खँ तकं हयाच्वंपिं नं दुगु न्ह्यथंसें वक्तव्यय् थ्व इलय् लिउने लानाच्वंपिं जनजाति मिसा दलित अल्पसंख्यकत अझ हे लिउने हे लाकेगु षडयन्त्र जुयाच्वंगुलिं बन्द सान्दर्भिक जूगु तायेकाः समाजपाखें जेठ १८ गते आह्वान याःगु नेपालमण्डल बन्दयात थःपिसं सक्रिय समर्थन यानागु खँ न्ह्यथनातःगु दु ।

अथेहे नेवाः जागरण संकिपा माचं छगू प्रेस वक्तव्य पितबिसें जेठ १८ गते आह्वान यानातःगु बन्द ज्याझ्वःयात समर्थन याःगु दु । नेवाः जागरण संकिपा माचया प्रमखु विजयरत्न असंबरें हस्ताक्षर यानाः पितबिउगु प्रेस वक्तव्यय् नेवाः भूमिइ नेवाः अधिकारयात स्थापित यायेत ऐतिहासिक नेपालमण्डल लागय् नेवाः स्वायत्त राज्यया माग यासें नेवाः स्वायत्त राज्य मंकाः संघर्ष समितिपाखें घोषणा याःगु जेठ १८ गतेया नेवाः स्वायत्त राज्य बन्द ज्याझ्वः प्रति पूर्ण समर्थन व ऐक्यवद्धता प्वंकूगु दु । न्हूगु नेपाः संघीय नेपाः नीस्वना जक सम्भव जुइ धयातःगु उगु वक्तव्यय् फुक्कं चलचित्रकर्मितय्पाखें नं बन्दया पूर्ण सहयोग समर्थन व सहभागीता जरुरी जूगु तायेकागु न्ह्यथनातःगु दु ।

थ्वहे झ्वलय् कन्हय् सनिवाः सुथय् ७:३० बजे इतुंबहालय् नेवाः स्वायत्त राज्य मंकाः संघर्ष समिति व नेवाः राष्ट्रिय मुक्ति मोर्चा २६ वडाया ग्वसालय् 'काठमाडौं उपत्यका शहरी विकास विधेयकया खारेजी छाय् ?' धइगु विषययात कयाः अन्तरक्रिया ज्याझ्वः यायेत्यंगु दु । ज्याझ्वलय् वक्तातय्सं राजधानी प्रदेश व शहरी विकास विधेयकयात कयाः ध्वाथुइकादीगु ज्याझ्वः दु ।