ढुङ्गेलयात आममाफी बिइगु निर्णयया थीथी थासं विरोध
सर्वोच्च अदालतपाखें कर्तव्य ज्यान मुद्दाय् सर्वस्वलिसे जन्मकैद सजाँय न्यंकूम्ह एनेकपा (माओवादी)या सभासद बालकृष्ण ढुङ्गेलयात आममाफी बिइकेत मन्त्रिपरिषदं याःगु सिफारिसप्रति नेकपा (एमालें) थःगु गम्भीर ध्यानाकर्षण जूगु खँ धाःगु दु ।
एमालें बुधवाः छगू विज्ञप्ती पिथना सर्वोच्च अदालतं याःगु फैसला अनिवार्य रूपय् पालन यायेगु दायित्व सरकारया जूगु सन्दर्भय् मन्त्रिपरिषदया थुगु निर्णयं दण्डहीनतायात पृष्ठपोषण नापं याःगु खँ न्ह्यथंगु दु । राष्ट्रिय सहमतिया वातावरण तयार जुयाः वनाच्वंगु इलय् आम जनता व संसदय् ब्वति दुगु प्रतिपक्ष दलतय्गु भावना अःखः संविधान व कानुनयात नापं बेवास्ता यानाः याःगु उगु निर्णय याकनं लित कायेत एमालें विज्ञप्तीपाखें सरकारनाप माग याःगु दु ।
अथेहे मधेसी जनअधिकार फोरम नेपालं नं छगू विज्ञप्ती पिथना सभासद ढुङ्गेलयात आममाफी बिइत मन्त्रिपरिषदं याःगु निर्णय दण्डहीनतायात तिबः बिइगु व अपराधजन्य ज्यायात प्रोत्साहित याइगु न्ह्यथंसें उगु निर्णय याकनं लित कायेत माग याःगु दु ।
थ्वहे दथुइ थीथी संघ संस्थां सभासद् बालकृष्ण ढुङ्गेलयात कारवाही यायेमाःगु माग यानाः बुधवाः सिंहदरबारया दक्षिण लुखालिक्क धर्ना ब्यूगु दु । न्यायया निंतिं द्वन्द्व पीडित समाज, नेपाल माओवादी पीडित संघ, राष्ट्रिय संघर्ष समिति, द्वन्द्व पीडित टुहुरा समाज व नागरिक अधिकारकर्मीतय् मंकाः ग्वसालय् उगु धर्ना बिइगु ज्या जूगु खः ।
