कन्हय् निसें आदिवासी जनजातितय् राष्ट्रिय भेला
नेपाल आदिवासी जनजाति महासंघया निक्वःगु राष्ट्रिय भेला विहीवाःनिसें सिन्धुपाल्चोकया सदरमुकाम चौताराय् न्ह्याइगु जूगु दु । निन्हुतक्क न्ह्याइगु उगु भेलाया फुक्कं तयारी पूवंगु जानकारी स्थानीय व्यवस्थापक महासंघया जिल्ला समन्वय परिषद्ं ब्यूगु दु ।
'आदिबासी जनजातिया इनाप - आदिवासी जनजातिया अधिकार सुनिश्चित जूगु न्हूगु संविधान' धइगु मू नारालिसे जुइत्यंगु भेलाय् बुधवाःनिसें देय्न्यंकया प्रतिनिधि भेला स्थलपाखे वनेगु ज्या न्ह्यानाच्वंगु खँ धाःगु दु । भेलायात संविधानसभाया नायः सुभाषचन्द्र नेम्वाङं विहीवाः छगू समारोहया दथुइ उलेज्या यानादीगु ज्याझ्वः दु । भेलाय् कांग्रेस सभापति सुशील कोईराला, एमाले नायः झलनाथ खनाल लगायत राजनीतिक दलया शीर्ष नेता लिसें संस्कृति मन्त्री गोपाल किराँतीया ब्वति दइगु खँ ग्वसाःखलकं बिउगु दु ।
महासंघ आवद्ध थीथी संस्था व सुइच्यागू जिल्लाया समन्वय परिषद्पाखें स्वसः स्वयां आपालं प्रतिनिधितय्सं भेलाय् ब्वति काइगु जानकारी सिन्धुपाल्चोक परिषद्या नायः टासी लामा ह्योल्मों बियादिल ।
