'न्ह्यगू बुँदे सहमति झिंनिगू बुँदेया मेगू अवतार'
राष्ट्रिय प्रजातन्त्र पार्टी नेपालया नायः कमल थापां छुं ई न्ह्यः जक जूगु न्ह्यगू बुँदे सम्झौता भारतीय शासकया प्रत्यक्ष संलग्नता व प्रायोजनय् न्हापा जूगु झिंनिगू बुँदे सम्झौताया मेगू अवतार जूगु बिचाः प्वंकादीगु दु ।
विराटनगरय् बुधवाः संवाददातातलिसे खँल्हानादिसें थापां न्हय्गू बुँदे सम्झौताया मूल रचनाकार भारतीय शासक व नेपाःया उग्रवामपन्थी शक्ति माओवादी जूगु न्ह्यथनादिसें थापां मेमेगू दलत धाःसा दबावय् लानाः उकिइ सहमत जूगु द्वपं नापं बियादिल ।
न्ह्यगू बुँदे सहमतिया उद्देश्य संविधानसभाया म्याद हाकनं नं तनाः देय्यात यथास्थितिइ तयाः थौंकन्हय् जुयाच्वंगु ब्रम्हलूटयात निरन्तरता बिइगु जूगु बिचाः नायः थापां तयादिल । उगु सम्झौतां प्रजातन्त्र व प्रजातान्त्रिक शक्तियात कमजोर दयेकेगु दावी नं थापां यानादिल ।
दलतय्सं थःगु स्वार्थ कथं प्रदेशत कायम यायेगु निंतिं राज्य पुनर्संरचना यायेत विज्ञतय्गु पुचः दयेकेगु सहमति याःगु न्ह्यथनादिसें थापां थुकिया निंतिं जनमत संग्रह हे उत्तम जुइगु बिचाः तयादिल ।
