मजदुर नेता पन्तयात संगठनं साधारण दुजःपाखें निलम्बन
एकीकृत नेकपा (माओवादी)या सभासद् लिसे मजदुर नेता शालिकराम जमरकट्टेलयात सांघातिक आक्रमणय् ल्हाःदुम्ह तारानीधि पन्तयात माओवादी मजदुर संगठनं साधारण दुजःपाखें निलम्बन याःगु दु ।
अखिल नेपाल ट्रेड युनियन महासंघया न्याक्वःगु राष्ट्रिय सम्मेलन आयोजक समितिया संयोजक पोष्टबहादुर बोगटीं बुधवाः छगू विज्ञप्ती पिथना पन्तयात मंगलवाःया मितिनिसें निलम्बन यानागु जानकारी बियादीगु खः । संगठनया पूर्व नायःयात सांघातिक आक्रमणया मुख्य योजनाकार जुयाः गैर राजनीतिक व भौतिक रुपं हे समाप्त यायेगु उद्देश्यलिसे आक्रमण यायेगु थेंज्याःगु अपराधिक ज्या याकूगु व नेपाल प्रहरीं सार्वजनिक यायेधुंकाः संगठनया स्वापुतिइ मवसे बिस्युं वनाच्वंगुलिं वयात निलम्बन यानागु खँ विज्ञप्तीइ न्ह्यःथनातःगु दु ।
विज्ञप्तीइ संयोजक बोगटीं पन्तलिसे छुं नं सम्बन्ध मतयेत व कानुनी कारबाहीया निंतिं ग्वाहालि मयायेत नं फुक्कसित इनाप यानादीगु दु ।
