नागरिक समाजया भूमिका बारे गोष्ठी
ख्वप (सन्ध्या टाइम्स) / गैर सरकारी संस्था महासंघ ख्वप जिल्ला शाखाया ग्वसालय् बिहिवाः नेपाल बार एशोसियसनया सभाकक्षय् 'वर्तमान परिस्थितिइ नागरिक समाजया भूमिका' विषयय् अन्तरक्रियात्मक गोष्ठी जुल । गैसस महासंघया खुक्वःगु महाधिवेशनं निर्वाचित न्हूपिं पदाधिकारीतय्त बधाई व अभिनन्दन यायेगु कथं न्ह्याकूगु ज्याझ्वः प्रमुख जिल्ला अधिकारी कमलमणि काफ्लें उलेज्या यानादिल । ज्याझ्वलय् वय्कलं न्हूगु संविधान दयेकेगु ज्याय् फुक्कं राजनीतिक पार्टीत नापं नागरिक समाजं उलि हे चिउताः क्यनेमाः धयादिल ।
गैसस महासंघ नेपाः ख्वप जिल्ला शाखाया नायः दुर्गामोहन श्रेष्ठया सभापतित्वय् जूगु ज्याझ्वलय् नेकपा एमाले ख्वप जिल्लाया दुजः बच्चन देउजां राजनीतिक दलत नागरिक समाजया लिउ लिउ वंगुलिं जक २०६२/६३ सालया आन्दोलन सफल जूगु खः धयादिल । अथे हे नेपाली कांग्रेसया नेता मदनकृष्ण श्रेष्ठं इलय् न्हूगु संविधान मवइगु शंका प्वंकूसें इलय् नागरिक समाज सक्रिय जुइमाःगु बिचाः प्वंकादिल ।
ज्याझ्वलय् मानव अधिकारकर्मि हरिराम श्रेष्ठं असोज १८ व माघ १९ या जुजु ज्ञानेन्द्रया पलाः विरुद्ध राजनीतिक पार्टीतय्सं न्ह्याकाच्वंगु आन्दोलनयात नेपाली जनतां विश्वास यानामच्वंगु इलय् नागरिक समाजं न्ह्यलुवाया भूमिका म्हिताः उमिगु हे दवावय् पार्टीया सक्रियताय् गणतन्त्र तक वःगु न्ह्यथँसें थौं नागरिक समाजयात राजनीतिक पार्टीतय्सं उपेक्षा याःगु द्वपं बियादिल ।
