सभासद् ढुंगेलया सजाय मिनहा यायेगु निर्णय
सर्वोच्च अदालतं मनू स्यागू द्वपनय् सर्वस्व सहितया जन्मकैद न्यंकूम्ह माओवादी सभासद् बालकृष्ण ढुंगेलया सजाय मिनहा यायेगु निर्णय याःगु दु । मन्त्रिपरिषदया मंगलवाः च्वंगु मुँज्यां सभासद् ढुंगेलया सजाय मिनाह यायेगु निर्णय यासें उकीया निंतिं राष्ट्रपतियात सिफारिस यायेगु निर्णय नं याःगु दु ।
सभासद् ढुंगेलयात २०५५साल असार १० गते ओखलढुंगाया तारकेराबारीइ उज्जनकुमार श्रेष्ठयात गोलीं कयेकाः स्याःगु अभियोगय् सर्वोच्चं उगु फैसला न्यंकूगु खः । अन्तरिम संविधानया कथं मन्त्रिपरिषदया सिफारिसय् राष्ट्रपतिं आम माफी बिइफइगु व्यवस्था दु ।
अथेहे सरकारं भारतया राजदूतया निंतिं राम कार्की, चीनय् डा. महेश कुमार मास्के व युएईया निंतिं परराष्ट्र सचिव धनन्जय झायात सिफारिस याःगु दु ।
