कांग्रेसय् विवाद जारी फोरमय् गच्छेदार हे नेता
यें (सन्ध्या टाइम्स) / सरकारय् वनेगु खँय् विवाद तच्वया वनेवं थौं कांग्रेस केन्द्रीय समितिया बैठक च्वनेत्यंगु दु । सानेपास्थित कांग्रेसया ज्याकुथी च्वनीगु बैठकय् सुयागु नेतृत्वय् सरकारय् वनेगु धइगु बारे निर्णय याइगु खँ धाःगु दु ।
थ्वहे झ्वलय् थौं सुथय् कांग्रेस सभापति गिरिजाप्रसाद कोइरालाया छेँय् कांग्रेसया अनौपचारिक बैठक च्वंगु खँ सीदुगु दु । उगु बैठकय् सभापति कोइरालां रामचन्द्र पौडेलया नेतृत्वय् सरकारय् वनेगु बिचाः प्वंकादीगु खःसा उकियात सभापति कोइरालाया म्ह्याय् सुजाता कोइरालां विरोध याःगु खँ सीदुगु दु । सुजातां थःगु हे नेतृत्वय् सरकारय् वनेमाःगु दावी याःगु खँ नं सूत्रं धाःगु दु । तर सुजाताया उगु प्रस्तावयात धाःसा कांग्रेसया वरिष्ठ नेता शेरबहादुर देउवा व कार्यवाहक सभापति सुशील कोइरालां विरोध याःगु खँ सीदुगु दु ।
कांग्रेसं सरकारया नेतृत्व याइम्ह नेताया बारे निर्णय याये मफयाच्वंगुलिं कन्हय् संसदीय समितिइ सहलह यानाः जक सरकारय् वनीपिनि नांधलः तयार याइगु खँ धाःगु दु ।
उखे मधेशी जनअधिकार फोरमपाखें वरिष्ठ नेता विजय गच्छेदारं हे सरकारया नेतृत्व याइगु जूगु दु । गच्छेदारं थःगु नेतृत्वय् सरकारय् वनेगु धकाः प्रधानमन्त्री माधव नेपालयात पौ नापं बीधुंकूगु दु । थौं सुथय् प्रम निवास बालुवाटारय् प्रम नेपाल गच्छेदार कांग्रेस नेता रामचन्द्र पौडेल व फोरम अध्यक्ष उपेन्द्र यादव दथुइ जूगु वार्ता लिपा गच्छेदारं सरकारया नेतृत्व यायेगु सहमति जूगु खः ।
फोरमया वरिष्ठ नेता गच्छेदारया नेतृत्वय् सरकारय् वनेगु खँयात अध्यक्ष उपेन्द्र यादव पक्षं धाःसा असन्तुष्टि प्वंकाच्वंगु खँ सीदुगु दु ।
