छवाःया दुने गृहमन्त्रालयं श्वेतपत्र जारी याइ : गृहमन्त्री
गृहमन्त्री विजयकुमार गच्छदारं जनतायात शान्ति व सुरक्षाया दीर्घकालीन अनुभूति बिइत छवाःया दुने श्वेतपत्र जारी यायेगु खँ धयादीगु दु । वय्कलं उगु हे अवधिया दुने गृहमन्त्रालयं सुरक्षा सम्बन्धी न्हूगु कार्ययोजना नापं सार्वजनिक यायेगु दाबी यानादिल ।
सुनसरीया तरहराय् सोमवाः निसें न्ह्याःगु पूर्वाञ्चल क्षेत्रीय सुरक्षा भेलाय् ब्वति काःवनेगु झ्वलय् सञ्चारकर्मितलिसे खँल्हाबंला यानादिसें गृहमन्त्री गच्छदारं गृह मन्त्रालयसं राजनीतिक हस्तक्षेप बन्द यायेगु धयादिल । वय्कलं श्रोत व साधन अप्व दुगु गृहमन्त्रालयय् भ्रष्टाचारयात नं थुगु हे अभियान मार्फत समाप्त यायेगु दाबी यानादिल । मेगू मन्त्रालयसं स्वयां अप्वः गृहमन्त्रालयसं भ्रष्टाचार व हस्तक्षेप जुइगु यानाच्वंगु नं वय्कलं धयादिल ।
कन्हय् तक्क न्ह्याइगु सुरक्षा भेलाय् सुरक्षाया अवस्था व रणनीतिया बारे सहलह जुइ । पूर्वी पहाडी लिसे तराईया जिल्लाय् भूमिगत समूह विरुद्ध गज्याःगु रणनीति अख्तियार यायेगु धइगु बिषयसं सहलह केन्द्रीत जुइगु खँ धाःगु दु । अथेहे सम्मेलनय् सीमावर्ती क्षेत्रय् जुइगु अपराधिक गतिविधि नियन्त्रण लिसे सरकारं घोषणा याःगु तत्काल राहत लिसे सुधार ज्याझ्वःया कार्यान्वयन व अनुगमनया विषयसं नापं सहलह जुइगु गृहमन्त्रालयं जानकारी बिउगु दु ।
