सोलुखुम्बुं द्वछि व न्हय्सः पर्यटकत उद्दार
खराब मौसमया कारण छवाः न्ह्यःनिसें हवाई उडान अवरुद्ध जुयाः सोलुखुम्बुया लुक्ला व फाप्लुइ अलपत्र थ्यंमथ्यं द्वछि व न्हय्सः पर्यटकत सोमवाः उद्दार याःगु दु । सोमवाः जक पर्यटकतय् उद्दार यायेत थीथी विमान कम्पनीया जहाजपाखें न्यय्प्यंगू व हेलिकोप्टरपाखें स्वीस्वंगू उडान याःगु जिल्ला प्रहरी ज्याकू सोलुखुम्बुया प्रहरी निरीक्षक प्यारेलाल लामां जानकारी बियादिल ।
नेपाल एयरलाइन्स, सीता, तारा व अग्नी एयर लगायतया विमान लिसे सिमरिक, फिस्टेल, डाइनेष्टी, माउण्टेन लगायतया हेलिकोप्टर कम्पनीं सनिलय् तक्क नं उद्दार याःगु खः । खराब मौसमया कारण अलपत्र थ्यंमथ्यं निद्वः पर्यटकतय्त अझ उद्दार यायेमनीगु अवस्थाय् दुगु खँ धाःगु दु । मेपिं द्वछि पर्यटकतय्त उद्दार याःसा स्थिति सहज जुइगु अनुमान पर्यटन व्यवसायीय्सं याःगु दु ।
न्हय्न्हु न्ह्यःनिसें पदयात्री व पर्यटकत अलपत्र जुइवं उमिगु नयेगु व च्वनेगु व्यवस्था मिलय् यायेत स्थानीय होटल व्यवसायीतय्त नापं समस्या जूगु खः । छुं विदेशी पर्यटकया भिसाया ई नापं क्वचाःगु दु । अलपत्र जूपिं मध्ये स्वसः व खुइखुम्ह पर्यटकतय्त आइतवाः येँय् हःगु खः ।
