बन्द ताःलाकेत याझ्वः
यें (सन्ध्या टाइम्स) / जेठ १८ गते नेवाः स्वायत्त राज्य मंकाः संघर्ष समितिया ग्वसालय् जुइत्यंगु नेपालमण्डल बन्द व सरकारं हयेत्यंगु शहरीकरण विधेकयया विरोधय् बुंगय् ज्याझ्वः जुल । उकी न्ववासें नेवाः जागरण माचया सल्लाहकार डा। महेश- मान श्रेष्ठं बन्द ताःलाकेत सकलें नेवाःत जायेमाःगु खँ कनादिल । नेवाः जागरण माच बुंग कचाया ग्वसालय् जूगु उगु ज्याझ्वलय् माचया संयोजक सुजीव वज्राचार्य थौंया इलय् नेवाःत न्ह्यचिलेमाःगु खँ ध्वाथुइकादिल । माचया बुंग कचाया प्रमुख राजरत्न नेवाःलं बुंगया नेवाःत संगठित रुपं न्ह्यःने वइगु बिचाः प्वंकादिल ।
मशाल जुलुस : उखे बन्द ताःलाकेत म्हिगः येँया कालिमाटी दुवातं छगू मशाल जुलुस पिहां वल । जुलुस न्ह्यः जूगु सभाय् नरेशवीर शाक्य सुरेश श्रेष्ठ सानुराजा शाक्य सुजीव वज्राचार्यं बन्दया बारे न्ववानादीगु खः । मशाल जुलुस देय् चाःहिलाः बसन्तपुली थ्यंकाः क्वचाःगु खः ।
