दच्छिया दुने संक्रमणकाल क्वचाइ : आचार्य
संवैधानिक समितिया सभापति निलाम्बर आचार्यं आःया दच्छिया दुने जारी संक्रमणकालीन अवस्था क्वचाइगु दावी यानादीगु दु ।
रिपोटर्स क्लबं आइतवाः येँय् याःगु साक्षात्कार ज्याझ्वलय् वय्कलं दच्छिया दुने संविधान जारी जुयाः न्हूगु निर्वाचन जुइगु व लोकतान्त्रिक व्यवस्था संस्थागत जुइगु नं धयादिल । आःया खुलाया दुने संविधान जारी जुइगु धयादिसें वय्कलं वयाः मेगू खुलाया दुने न्हूगु निर्वाचन जुइगु धयादिल । प्रमुख दलत दथुइ जूगु न्हय्गू बुँदे सम्झौतां संविधान जारी यायेगु लकस निर्माण जूगु दावी यानादिसें आःया लच्छिया दुने संविधानया प्रारम्भिक मस्यौदा जारी यायेफइगु धयादिल ।
न्हूगु संविधान जारी यायेगु निंतिं मेगू खुला थप यायेमाःगु धयादिसें सभापति आचार्यं खुलाया दुने संविधान जारी जुइगु दावी यानादिल । संविधानय् मू समस्याया दुगु शासकीय स्वरुप व निर्वाचन प्रणालीइ दलत सहमति नापसं थ्यंगु व राज्य पुनर्संरचना बारे नं विज्ञतय् पुचः नीस्वनेधुंकूगुलिं आः संविधान जारी जुइगु धयादिल ।
वय्कलं राष्ट्रपति व प्रधानमन्त्री निगूलिं व्यवस्था दुगु शासकीय स्वरुप व प्रत्यक्ष व समानुपातिक व्यवस्था दुगु मिश्रित निर्वाचन प्रणालीइ दलत सहमतिया नापसं थ्यंगु धयादिल ।
