राष्ट्रपति व प्रधानमन्त्री दथुइ खँल्हाबंला
राष्ट्रपति डा. रामवरण यादव व प्रधानमन्त्री डा. बाबुराम भट्टराई दथुइ आइतवाः खँल्हाबंला जूगु दु ।
राष्ट्रपति भवन शितल निवासय् जूगु खँल्हाबंलाय् प्रधानमन्त्री भट्टराईं झिंन्हय्क्वःगु सार्क शिखर सम्मेलनया बारे जानकारी बियादीगु खः । उगु इलय् प्रधानमन्त्रीं थुगुसीया सार्क सम्मेलनय् नेपालं न्हापाया सम्झौतात कार्यान्वनय् बः बिइगु निंतिं 'आः ज्या यायेनु' धइगु छगू एजेण्डा न्ह्यब्वइगु धयादिल ।
सम्मेलनय् ब्वति कायेत प्रधानमन्त्री भट्टराई वइगु मंगलवाः झिंछम्ह दुजःया नेतृत्व यासें माल्दिभ्स वनीगु ज्याझ्वः दु । सार्क सम्मेलन वइगु कात्तिक २४ व २५ गते माल्दिभ्सय् जुइत्यंगु दु ।
अथेहे नापलय् ज्याय् राष्ट्रपति यादवं शान्ति प्रक्रिया, सेना समायोजना लगायत विषयलय् प्रमुख दलत दथुइ जूगु सहमतिइ लसता प्वंकादीगु खः । प्रमुख दलत दथुइ न्हय्गू बुँदे सम्झौता जुइधुंकाः राष्ट्रपति व प्रधानमन्त्री दथुइ जूगु थ्व न्हापांगु खँल्हाबंला खः ।
