सरकारं झिंछक्वःगु अन्तरिम संविधान संशोधन प्रस्ताव दर्ता
संविधानसभा अन्तर्गत राज्य पुनर्संरचनाया विवादित विषयत ज्यंकेगु निंतिं विज्ञतय् समिति नीस्वनेत सरकारं अन्तरिम संविधानया झिंछक्वःगु संशोधन प्रस्ताव दर्ता याःगु दु ।
मन्त्रिपरिषदया शुक्रवाः च्वंगु मुँज्यां राज्य पुनर्संरचाया बारे विवाद ज्यंकेत विज्ञतय् पुचः नीस्वनेगु संशोधन प्रस्ताव पारित यायेवं उकियात संसद सचिवालयय् दर्ता याकूगु खः । अन्तरिम संविधानया धारा १३८ (२)लय् राज्य पुनर्संरचना आयोग गठन यायेगु धकाः न्ह्यथनातःगुयात आः विज्ञ पुचःतय् समिति नीस्वनेगु धकाः संशोधन प्रस्ताव दर्ता याःगु खः । उगु प्रस्तावयात कानून मन्त्री बृजेशकुमार गुप्ता व संविधानसभा मन्त्री गोपल किराँतीं संसद सचिवालयय् दर्ता याकूगु खः ।
थ्वस्वयां न्ह्यः शुक्रवाः सुथय् संविधानसभाया विवाद ज्यंकेत नीस्वंगु उपसमितिया मुँज्यां राज्य पुनर्संरचना यायेत विज्ञतय् समिति नीस्वनेगु निर्णय याःगु खः ।
