उच्चस्तरया सहमति आवश्यक : प्रधानमन्त्री
प्रधानमन्त्री माधवकुमार नेपालं दलत दथुइ न्हापाया स्वयां उच्चस्तरया सहमतिया आवश्यकता जूगु खँ धयादीगु दु ।
नेपालय् गणतन्त्र पलिस्था जूगु दच्छि क्यंगु लसताय् शुक्रवाः येँय् जूगु विषेश समारोहलय् सम्बोधन यायेगु झ्वलय् प्रधानमन्त्री नेपालं संक्रमणकालं न्ह्यावनाच्वंगुलिं परिवर्तनया संवाहक सहित दक्व दलत दथुइ उच्चस्तरिय सहमतिया आवश्यकता जूगु खँ धयादीगु दु ।
समारोहलय् प्रधानमन्त्री नेपालं देय् इतिहासया जटिल व हाथ्यापूर्ण ईलं न्ह्या वनाच्वंगुलिं नं उच्चस्तरिय सहमतिया आवश्यकता जूगु धयादिल । प्रमुख दलत दथुइ धुरविकरण अप्वया वनाच्वंगु ईलय् प्रधानमन्त्री नेपालं उच्चस्तरिय सहमतिया आवश्यकताय् बः बियादीगु खः ।
निर्धारित ईलय् हे न्हूगु संविधान निर्माण यायेगु व न्हूगु संविधान निर्माण यायेत सरकार इमान्दारिताया साथ न्ह्याः वनीगु प्रतिबद्धता नं वयेकलं प्वंकादिल ।
गणतन्त्र घोषणा जूगु दच्छि देयेकाः नं देशय् हत्या, हिंसाया घटनाया पूर्णरुपं अन्त्य मजूगु धासें प्रधानमन्त्री नेपालं हिंसाया घाः अझ लंके मफूगुलिं सहमति, सहकार्य व एकताया निंतिं दक्वसित इनाप यानादिल । न्हापाया विमतियात संवादया मार्फत न्ह्यनेयंकेगु धासें वयेकलं संवाद मार्फत समस्या हल यायेफइगु बीचाः प्वंकादिल ।
विशेष समारोहया सम्बोधन यानादिसें प्रधानमन्त्री नेपालं आन्दोलनय् घाःपाः जुपिं दक्वसिया उच्च मुल्यांकन जुइगु धयादिल । विशेष समारोहलय् राष्ट्रपति डा. रामवरण यादव, उपराष्ट्रपति परमानन्द झा, प्रधानन्यायाधीश मीनबहादुर रायमाझी, सभामुख सुवाष नेम्वाङ नापं उच्च अधिकारीतय् उपस्थिति दुगु खसां माओवादीया शीर्ष नेतातय्सं धासाः समारोहलय् ब्वति कयामदी ।
