मुस्लिम समुदायपाखें आन्दोलनया घोषणा
इस्लामिक संघ नेपालया महासचिव फैजन अहमदया हत्यारायात सरकारं अझ ज्वने मफुगु धासें फैजन हत्याकाण्ड संघर्ष समितिं आन्दोलनया घोषणा याःगु दु । ताः ई जुइधुंकाः नं सरकारं हत्यारायात ज्वनेमफुगु व सरकारं सम्झौता कार्यान्वयन मयागु धासें आन्दोलनया घोषणा याःगु खः ।
संघर्ष समितिं कात्तिक २६ गते तक नं थःपिंसं न्ह्यथंगु खुगू बुँदे माग पूकवंमूसाः वयांलिपा आन्दोलन यायेगु खँ धाःगु दु । संघर्ष समितिं शुक्रवाः छगू विज्ञप्ति पिथना कात्तिक २९ गते निसें मंसिर ९ गते तक थीथी जिल्लाय् खबरदारी सभा व जुलुस, १० गते मसाल जुलुस व ११ गते निसें फुक्कं तराई व पहाडी क्षेत्रय् अनिश्चितकालीन चक्काजाम यायेगु खँ न्ह्यथंगु दु ।
समितिं सरकारं २०६५ साल चैत १ व ३ गते मुस्लिम राष्ट्रिय संघर्ष समितिनाप याःगु सम्झौता कार्यान्वयन यायेमाःगु, थीथी मुस्लिम अगुवाया हत्या प्रकरणय् नीस्वंगु समितिया प्रतिवेदन सार्वजनिक यायेमाःगु, मुस्लिम समुदायया अगुवा व धार्मिक संस्थाया बारे न्यनाच्वंगु भ्रमया बारे सरकारया स्पष्ट धारणा वयेमाःगु, फैजन अहमदयात शहिद घोषणा यायेमाःगु, हत्यारायात कारवाही यायेमाःगु लगायत माग यानातःगु दु ।
