विज्ञ समिति नीस्वनेगु उपसमितिया निर्णय
संविधानसभा अन्तर्गत विवाद समाधान यायेत गठन जूगु उपसमितिया मुँज्यां राज्य पुनर्संरचना बारेया विवाद समाधान यायेत विज्ञ समिति नीस्वनेगु निर्णय याःगु दु ।
ताः ई लिपा विवाद समाधान उपसमितिया शुक्रवाः च्वंगु मुँज्यां संविधान संशोधन यानाः संविधानसभायापाखे विज्ञत दुथ्याःगु समिति नीस्वनेगु निर्णय याःगु खः । अन्तरिम संविधानय् राज्य पुनर्सरचना आयोग दयेकेगु धकाः न्ह्यथनातःगुलिं उकियात संशोधन यानाः विज्ञतय् समिति दयेकेत पहल न्ह्याकीगु जूगु दु । उगु विज्ञ समितिं राज्य पुनर्संरचनाय् खनेदुगु विवादया बारे प्रतिवेदन न्ह्यब्वइगु व उगु हे आधारय् राज्य पुनर्संरचना याइगु जूगु दु ।
अथेहे मेगू विवादित विषयत शासकीय स्वरुप व निर्वाचन प्रणालीया बारे नं समस्या ज्यंकेत कार्यदल नीस्वनेगु निर्णय याःगु दु । नेपाली कांग्रेसं शान्ति प्रक्रिया बारे ठोस सहमति मजुइकं संविधान निर्माण प्रक्रिया न्ह्याःवनेमफइगु धायेवं ताः ई न्ह्यः निसें संविधान निर्माण यायेगु ज्या ठप्प जूगु खःसा कात्तिक १५ गते शान्ति प्रक्रिया बारे सहमति जुइवं संविधान निर्माणय् सहजता खनेदुगु खः ।
