माओवादी केन्द्रीय मुँज्या कात्तिक २७गते तक स्थगित
वैद्यपाखें झिगू बुँदे विरोध पत्र दर्ता
एकीकृत नेकपा (माओवादी)या केन्द्रीय मुँज्या बिहीवाः छुं ईया निंतिं च्वनाः कात्तिक २७ गते तकया निंतिं स्थगित जूगु दु ।
माओवादीया बिहीवाः च्वंगु मुँज्याय् पार्टी नायः पुष्पकमल दाहाल 'प्रचण्डं' राजनीतिक परिस्थिति व पार्टी दुनेया विवादया विषयलय् संक्षिप्त प्रतिवेदन न्ह्यब्वयादीगु खः । उगु प्रतिवेदतन लिपा देय्या राजनीतिक परिस्थिति व पार्टी दुनेया अन्तर संघर्ष बारे गम्भीर सहलह यायेमाःगुलिं बहस ताःहाक जुइफुगु धासें कात्तिक २७गते तकया निंतिं मुँज्या लिछ्याःगु खः ।
उखे पार्टी वरिष्ठ न्वकु मोहन वैद्य 'किरणं' धाःसा बिहीवाःया मुँज्या लिपा झिगू बुँदे विरोध पत्र दर्ता याकादीगु दु । वय्कलं मधेशी मोर्चा नाप जूगु सहमति लिसें कयाः सेना समायोजन बारे छुं न्हि न्ह्यः जक जूगु सम्झौतायात उगु पत्रय् दुथ्याकातःगु दु ।
उगु पत्रय् माओवादी नायः प्रचण्डं पार्टीयात जानकारी मबिउसें भारतया गुप्तचर संस्था 'र'यात नापलाःगु, लडाकूतय् ल्वाभः तयातःगु कन्टेनरया ताःचा लःल्हाःगु, भारतनाप याःगु बिपा सम्झौता लगायत बुँदात नं विरोध पत्रय् न्ह्यथनातःगु दु ।
