पशुपतिया भेटी सार्वजनिक याइगु
पशुपति विकास कोषं पशुपति व बासुकी देगलय् जुयाच्वंगु अनियमिततायात व्यवस्थित यायेगु निर्णय याःगु दु । कोषं पशुपति व बासुकी देगःया दक्षिणात सार्वजनिक यायेगु निर्णय नं याःगु खः । कोषया बुधवाः च्वंगु बैठकं पशुपति व बासुकीया दक्षिणात सार्वजनिक यायेगु निर्णय याःगु जानकारी संस्कृति मन्त्री गोपाल किराँतीं बियादिल । बैठकं निर्णय कार्यान्वयन यायेत कोषया सदस्यसचिव सुशील नाहटाया संयोजकत्वय् न्हय्म्ह दुजः दुगु भेटीघाटी व्यवस्थापन नियमावली तर्जुमा उपसमिति नीस्वनेगु निर्णय याःगु दु । नापं बैठकं बोर्डया कार्यकारी निर्देशकय् कोषप्रसाद आचार्ययात नियुक्त यानागु जानकारी मन्त्री किराँतीं बियादिल ।
