न्हय्गू बुँदे सम्झौता भिंकेत वैद्य पक्षया ख्याच्वः
प्रमुख राजनीतिक दलत दथुइ मंगलवाः बहनी सेना समायोजन, शान्ति प्रक्रिया, संविधान निर्माण व सत्ता साझेदारीया विषयलय् जूगु न्हय्गू बुँदे सम्झौता भिंकेत माओवादीया न्वकु मोहन वैद्य पक्षं ख्याच्वः बिउगु दु ।
न्हय्गू बुँदे सम्झौता जूगु कन्हय् कुन्हु बुधवाः येँया राष्ट्रिय सभागृहलय् छगू पत्रकार सम्मेलन यानाः वैद्यं न्हय्गू बुँदे सम्झौता देश व जनताप्रतिया गम्भीर धोका व आत्मसमर्पणवादी जूगु धयादिल । वय्कलं उगु सम्झौता भिंकेत पार्टी नेतृत्व व मेमेगू राजनीतिक दलतय्त इनाप यानादिल ।
'थुगु सम्झौता भिंकेत वा न्हूगु सम्झौता यायेत झीगू नेतृत्व व मेमेगू दलयात इनाप यानागु दु' वय्कलं धयादिल, 'यदि सम्झौता भिंकेगु ज्या मजूसाः झी मेगू आन्दोलन यायेत बाध्य जुइ ।'
पार्टी छप्पँ जुयाः डा. बाबुराम भट्टराईयात प्रधानमन्त्री दयेकूगु धयादिसें वय्कलं प्रधानमन्त्री जुइधुंकाः भट्टराईं गल्ती यानादीगु धयादिल । पार्टी विभाजनपाखे संकेत यानादिसें वय्कलं प्रधानमन्त्री थःम्ह याःगु गल्ती मिभंकूसाः मेगू चरणय् गम्भीर पलाः ल्ह्वनीगु धयादिल ।
वैद्य पक्षं लडाकूतय् सम्मानजनक रुपं ५० प्रतिशत मिलेयानाः समायोजन यायेमाःगु, समायोजन न्ह्यः राष्ट्रिय सुरक्षा नीति दयेकेमाःगु, सेना समायोजन प्रक्रिया व संविधान निर्माण नापं यायेमाःगु, लडाकूतय्त समूहगत रुपं समायोजन यायेमाःगु व समायोजन जुइपिं लडाकूतय्सं हे उगु पुचःया नेतृत्व यायेमाःगु माग याःगु दु ।
उगु हे ज्याझ्वलय् माओवादी मू छ्याञ्जे रामबहादुर थापा 'बादलं' न्हय्गू बुँदे सम्झौता जूगु कात्तिक १५ गतेयात हाकूगु न्हिया संज्ञा बियादिल । वय्कलं सम्झौतां मुक्तिकामी नेपाःमितय्त पीडा जूसाः दलालतय्सं धाःसा उकियात हर्सोल्लास रुपं काःगु न्ह्यथनादिल ।
