थौं गणतन्त्र दिवस
संविधानसभाया न्हापांगु बैठकं गणतन्त्र कार्यान्वयन यायेगु घोषणा याःगु न्हि कथं थौं देय्यंक गणतन्त्र दिवस न्यायेकाच्वंगु दु । दच्छि न्ह्यः थौया जेठ १५ गते संविधानसभाया न्हपांगु बैठकं अत्याधिक बहुमतया साथ गणतन्त्रया घोषणा याःगु खः । नेपाःया इतिहासय् निसः व पीदँ निसें राज यानाच्वंगु राजतन्त्रयात दच्छि न्ह्यः बिदाइ याःगु खः ।
थ्वहे लसताय् राष्ट्रपति डा. रामवरण यादवं न्हापांगु गणतन्त्र दिवसया लसताय् बिहिवाः छगू सन्देश पिथनादिसें शान्ति प्रकृया व संविधान निर्माणया गन्तव्य तक थ्यंकेफुसाः जक न्हूगु गणतन्त्र संस्थागत जुइगु धयादिल । अथेहे देय्या यथार्थ व आवश्यकतायात मनन यानाः दक्व नाप हातेमालो याना न्ह्यने वंसाः गन्तव्यय् थ्यंकेत थाकूमजूगु खँ धयादीगु दु ।
अथेहे उपराष्ट्रपति परमानन्द झां नं गणतन्त्र दिवसया लसताय् भिंतुना सन्देश ब्यूसें सकल नेपाःमिपिंत सुन्दर व शान्त नेपाल देयेकेत इनाप यानादलि ।
गणतन्त्र दिवसया लसताय् थीथी दलया नेतातय्सं नं भिंतुना देछानादीगु दु । नेपाली कांग्रेसया सभापति गिरिजाप्रसाद कोइराला, वरिष्ठ नेता शेरबहादुर देउवा, एकीकृत नेकपा (माओवादी)या अध्यक्ष पुष्पकमल दाहाल 'प्रचण्ड', नेकपा मालेया महासचिव सीपि मैनाली, राप्रपाया अध्यक्ष पशुपति सम्शेर राणा लगायत नेतातय्सं भिंतुना सन्देश ब्यूसें सहमति व सहकार्य यानाः न्हूगु शान्त व समृद्ध नेपाः देयेके माःगु खँ बः बियादीगु दु ।
