'दलत दथुइ जूगु सहमति ऐतिहासिक'
प्रमुख दलत दथुइ शान्ति प्रक्रिया क्वचायेकेगु बारे जूगु सहमतियात शीर्ष नेतातय्सं ऐतिहासिक निर्णयया संज्ञा बिउगु दु । सेना समायोजन लगायतया विषयलय् दलत दथुइ ताः ई न्ह्यःनिसें जुयाच्वंगु विवाद लिपा अन्ततः मंगलवाः जूगु सहमति पूर्णरुपं कार्यान्वयन जुइगु विश्वास नं नेतातय्सं प्वंकूगु दु ।
न्हय्गू बुँदे सहमति पत्रय् ल्हाःचिं तयेधुंकाः पत्रकारत लिसे खँल्हबंला यानादिसें माओवादी नायः पुष्पकमल दाहाल 'प्रचण्डं' शान्ति व सविधानप्रति जनताया चाहना साकार यायेत थुगु सहमति जूगु धयादिल । वय्कलं थःपिं इमान्दार जुयाः याःगु सहमति कार्यान्वयन जुइगु विश्वास प्वंकादिसें धयादिल, 'कार्यान्वयन जुइगु आधार दुगुलिं हे सहमति जूगु खः ।'
कांग्रेस सभापति सुशील कोइरालां दलत दथुइया सहमति ऐतिहासिक निर्णय जूगु न्ह्यनादिसें आः देशय् अमन चयन कायम जुयाः वनीगु धयादिल । वय्कलं सहमति कार्यान्वयन यायेगुया विकल्प मदुगु नं प्रष्ट यानादिल ।
अथेहे एमाले नायः झलनाथ खनालं सहमतिं नेपाःया राजनीतिइ दूरगामी महत्व तइगु धयादिसें सम्झौतायात ऐतिहासिक धयादिल । सहमतियात कार्यान्वयन यायेत एकताबद्ध जुयाः वनेमाःगु धयादिसें वय्कलं सम्झौता कार्यान्वयन यायेत एमाले इमान्दार जुयाः न्ह्याःवनीगु धयादिल ।
संयुक्त लोकतान्त्रिक मधेशी मोर्चापाखें सम्झौताय् ल्हाःचिं तयादीम्ह गृहमन्त्री विजयकुमार गच्छदारं नेपाःमितय्सं ताः ई न्ह्यःनिसें यानाच्वंगु आशा पूवंकेत थौं ऐतिहासिक सहमति जूगु धयादिल । थुगु सहमतिं न्हूगु संविधान च्वयेगु निंतिं न्हूगु दिशा बिइगु विश्वास नं वय्कलं प्वंकादिल ।
किपा : प्रधानमन्त्रीया निजी सचिवालय
