खुद्वः व न्यासः लडाकू समायोजन यायेगु सहमति
राहत प्याकेज कथं न्यागू निसें च्यागू लख बिइगु
शान्ति प्रक्रिया, संविधान निर्माण, सेना समायोजन व सत्ता साझेदारीया बिषयस प्रमुख राजनीतिक दलत दथुइ सहमति जूगु दु ।
सहमति कथं समायोजन जुइपिं लडाकूतय्त नेपाली सेना मातहतया महानिर्देशनालय गठन यानाः खुद्वः व न्यासः लडाकूत समायोजन याइगु जूगु दु । उगु महानिर्देशनालय अन्तर्गत गठन जुइगु बिस्कं एकाइलय् लडाकूतपाखें ३५ प्रतिशत व मेमेगू सुरक्षा निकाय पाखें ६५ प्रतिशत सुरक्षाकर्मीत दुथ्याकी । अथेहे समायोजनय् मवनीपिं लडाकूतय्त पुनस्थापना प्याकेज कथं न्यागू लख निसें च्यागू लख बिइगु नं क्वःछिउगु दु ।
प्रधानमन्त्री निवास बालुवाटारय् च्वंगु स्वंगू प्रमुख दलया मुँज्या लिपा स्वंगू दल व मधेशी मोर्चां दलत दथुइ जूगु सहमति पत्रय् ल्हाःचिं तःगु खः । माओवादीपाखें नायः पुष्पकमल दाहाल 'प्रचण्ड', कांग्रेस पाखें सभापति सुशील कोइराला, एमालेपाखें नायः झलनाथ खनाल व मोर्चायापाखें गृहमन्त्री विजयकुमार गच्छदारं ल्हाःचिं तयादीगु खः ।
अथेहे सहमति कथं छवाःया दुने लडाकू वर्गिकरणया प्रक्रिया न्ह्याकाः मंसिर ७ गते दुने उकियात क्वचाकीगु जूगु दु । अथेहे सत्यनिरुपण नापं मेलमिलाप आयोग व बेपत्ता छानबिन आयोग गठन यायेगु बारे संसदपाखें विधयेक पारित यानाः लच्छिया दुने निगूलिं आयोग गठन यायेगु सहमति जूगु दु ।
राज्य पुनर्संरचना बारे जुयाच्वंगु विवाद ज्यंकेगु निंतिं छगू विज्ञ पुचः नीस्वनाः लच्छिया दुने संविधानया प्रारम्भिक मस्यौदा न्ह्यःब्वयेगु सहमति नं जूगु दु । अथेहे द्वन्द्व पिडिततय्त राहत बिइगु, कब्जा यानतःगु सम्पत्ति लितबिइगु व लित बिइमफइगु छेँबुँया उचित क्षतिपूर्ति बिइगु व वाईसीइलया अर्ध सैन्य संरचना भंग यायेगु सहमति नं दलत दथुइ जूगु दु ।
किपा : प्रधानमन्त्रीया निजी सचिवालय
