याकन हे सहमति जुइगु शीर्ष नेतातय् विश्वास
शान्ति प्रक्रिया व संविधान निर्माण यायेगु ज्याय् प्रमुख स्वंगू दलत दथुइ याकन हे सहमति जुइगु विश्वास प्रमुख स्वंगू दलनापं मधेशवादी दलया शीर्ष नेतातय्सं प्वंकूगु दु ।
मोहनी, स्वन्ति, छठ व नेपाल संवत् ११३२ न्हूदँया लसताय् एनेकपा (माओवादीं) सोमवाः ग्वसाःग्वःगु भिंतुना कालबिल व तुच्चा ज्याझ्वलय् ब्वति काःपिं शीर्ष नेतातय्सं स्वंगू दलया वार्ता सकारात्मक रुपं न्ह्याः वनाच्वंगुलिं याकन सहमति जुइगु विश्वास प्वंकूगु खः ।
तुच्चा ज्याझ्वलय् माओवादी नायः पुष्पकमल दाहाल 'प्रचण्डं' माओवादी शान्ति प्रक्रिया व संविधान निर्माण यायेत प्रतिबद्ध जुयाः न्ह्याः वनाच्वंगु न्ह्यथनादिल । वय्कलं पार्टी दुने आन्तरिक विवाद जूसां शान्ति प्रक्रिया व संविधान निर्माणयात क्वचायेकेगु व पार्टी तज्याये मबिइगु प्रतिबद्धता प्वंकादिल ।
नेपाली कांग्रेसया सभापति सुशील कोइरालां स्वंगू दलत दथुइ जुयाच्वंगु वार्ता सकारात्मक जूगु धयादिसें थःपिंसं याकन हे शान्ति प्रक्रिया व संविधान निर्माणया बारे बुखँ न्यंकेगु धयादिल । नेकपा (एमाले)या नायः झलनाथ खनालं परिणाममुखी वार्ताय् स्वंगू दल जुटे जुयाच्वंगु न्ह्यथनादिल । वय्कलं स्वन्हु-प्यन्हुया दुने हे दलत दथुइ प्याकेजय् महत्वपूर्ण सहमति जुइगु धयादिल ।
गृहमन्त्री नापं मधेशी जनअधिकार फोरम (लोकतान्त्रिक)या नायः विजयकुमार गच्छदारं शान्ति व संविधान न्ह्याःगु हालतं नं पूवंकेमाःगु धयादिसें देय्या मू आवश्यकता शान्ति व संविधानया ज्या पूवंकेगुया विकल्प मदुगु धयादिल ।
तुच्चा ज्याझ्वलय् प्रधानमन्त्री डा. बाबुराम भट्टराई, सभामुख सुभाषचन्द्र नेम्वाङ, थीथी राजनीतिक दलया शीर्ष नेतात व कार्यकर्तात, सभासद्, कुटनीतिक नियोगया अधिकारी, उद्योग व्यवसायी, कलाकार, पत्रकार लगातया उपस्थिति दुगु खः ।
ज्याझ्वलय् वःपिंत पार्टी नायः प्रचण्ड, स्वम्हं न्वकुत लगायतया नेतातय्सं लसकुस याःगु खः ।
