प्रधानमन्त्री नेतात नापलायेगु ज्याय् व्यस्त
प्रधानमन्त्री माधवकुमार नेपालं थौं राष्ट्रपति डा. रामवरण यादव लगायत एकीकृत नेकपा (माओवादी)या अध्यक्ष पुष्पकमल दाहाल 'प्रचण्ड' व नेपाली कांग्रेसया सभापति गिरिजाप्रसाद कोइरालायात नापलाना खँल्हबंला यनादीगु दु ।
प्रधानमन्त्री जुइधुंकाः नेपालं थौं न्हापांगु खुशी राष्ट्रपतियात नापलानादीगु दु । राष्ट्रपति निवास शितल निवासय् वनाः प्रधानमन्त्री नेपालं राष्ट्रपति यादवयात लिपांगु राजनीतिक घटनाक्रम बारे जानकारी बियादीगु खः । अथेहे राष्ट्रपति यादवं सहमतिया आधारय् ज्या यायेत प्रधानमन्त्री नेपालयात इनाप यनादिल ।
थौं हे प्रधानमन्त्री नेपालं एकीकृत नेकपा (माओवादी)या अध्यक्ष पुष्पकमल दाहाल प्रचण्डयात नं नापलानादीगु दु । निर्वतमान प्रधानमन्त्री नापं जुयादिम्ह प्रचण्डया निवास न्हूगु बजाः वनाः प्रधानमन्त्रीं माओवादीयात सरकारय् ब्वति कायेत इनाप यानादीगु खः । लिसःलय् प्रचण्ड आः तत्काल माओवादी सरकारय् वनीगु सम्भावना मदुगु खँ धयादीगु खः । खँल्हाबंलाय् हिउँदे अधिवेशन क्वचायेकेगु विषयलय् नं खँ सहलह जूगु खः ।
अथेहे प्रधानमन्त्री नेपालं थौं सुथय् नेपाली कांग्रेसया सभापतियात नं नापलानादीगु खः । कोइराला निवासय् वनाः नापलायेगु झ्वलय् निम्ह नेतात दथुइ आइतवाः तकया दुन मन्त्रिपरिषदयात पूर्णता बीगू सहमति जूगु खः । अथेहे सरकारयात साझा न्युनतम ज्याझ्वयात तत्काल पूर्णता बीगु खँय् नं सहलह जूगु खः ।
