माओवादी स्थायी समितिइ वैद्य पक्ष अनुपस्थित
एकीकृत नेकपा (माओवादी) दुने खनेदुगु विवाद बारे सहलह यायेत आइतवाः च्वंगु स्थायी समिति मुँज्याय् पार्टी न्वकु मोहन वैद्य पक्षया नेतात अनुपस्थित जुइवं मुँज्या लिछ्याःगु दु । पार्टी विवाद ज्यंकेत सःतुगु मुँज्या वैद्य पक्षं बहिष्कार याःगु खःसां पार्टी प्रवक्ता दिनानाथ शर्मां धाःसा वैद्य पक्षया नेतात कार्यव्यस्तताया हुनिं मुँज्याय् ब्वति कायेमफुगु खँ धयादीगु दु ।
पार्टी दुनेया विवादया हुनिं शान्ति व संविधान निर्माण नापं सेना समायोजनया ज्या न्ह्याः वनेमफयाच्वंगुलिं पार्टी दुने सहमति यायेत स्थायी समिति मुँज्या आव्हान याःगु खः । तर वैद्य पक्षया नेतात अनुपस्थित जुइवं च्वंगु माओवादी अनौपचारिक मुँज्यां सेना समायोजन प्रक्रियायात न्ह्यःने न्ह्याकेगु निर्णय याःगु दु ।
प्रधानमन्त्री डा. बाबुराम भट्टराई नेतृत्वया सरकारं लडाकु शिविरया ताःचा सरकारयात लःल्हायेवं पिंहांवःगु आन्तरिक विवाद तच्वःगुलिं स्थायी समिति मुँज्या सःतेमाःगु खः । वैद्य पक्षं मधेशी मोर्चानाप जूगु प्यंगू बुँदे सम्झौता व भारतनाप जूगु बिपा सम्झौता तकं खारेजीया माग यानाच्वंगु दु ।
थ्वहे दथुइ माओवादी स्थायी समिति दुजः कृष्णबहादुर महराया मध्यस्तताय् आइतवाः सुथय् वैद्य पक्ष व संस्थापन पक्ष दथुइ वार्ता जुल । सुकेधारास्थित थःगु हे छेँय् निगू पक्ष दथुइ वार्ता याकूसां उगु मुँज्यां छुं सहमतिया लकस दयेकेमफुत ।
