प्रधानसेनापति गुरुङ चीनपाखे
प्रधानसेनापति छत्रमानसिंह गुरुङ आइतवाः छवाःन्यंकया चीन भ्रमणया निंतिं उखेपाखे प्रस्थान यानादीगु दु । चीनया जनमुक्ति सेनाया जनरल चेन वाङ दिया मैत्रिपूर्ण ब्वनाय् प्रधानसेनापति गुरुङ चीन झायादीगु खः ।
खुम्ह दुजः दुगु प्रतिनिधिमण्डलया नेतृत्वया यासें चीनय् झायादीम्ह गुरुङं चीनय् नेपाली सेनायात आधुनिकीकरण यायेगु व सेनाया क्षमता अभिवृद्धि यायेगु बारे सहलह याइगु ज्याझ्वः दु । वय्कःया अनुपस्थितिइ प्रधानसेनापतिया कार्यभारया जिम्मा बलाध्यक्ष रथी गौरवशमशेर जबरायात बिउगु दु ।
वस्वां न्ह्यः आइतवाः हे च्वंगु मन्त्रिपरिषदया मुँज्यां प्रधानसेनापतिया चीन भ्रमणया ज्याझ्वःयात स्वीकृत याःगु खः । मन्त्रिपरिषदं प्रधानसेनापतिया चीन भ्रमणया झ्वलय् वीरेन्द्र सैनिक अस्पतालयात प्राप्त जुइगु मेडिकल व तालिम उपकरण ग्वाहालि कायेगु अनुमति नं बिउगु दु ।
