चकंदबुलिइ प्रधानमन्त्री भट्टराईपाखें नेवाः भासं सम्बोधन
नेपाल संवत् न्हूदँ ११३२या लसताय् येँया चकंदबुलिइ जूगु ज्याझ्वलय् प्रधानमन्त्री डा. बाबुराम भट्टराईं नेवाः भासं सम्बोधन यानादीगु दु । सम्भवतः नेपालय् प्रजातन्त्र वयेधुंकाः सुं नं प्रधानमन्त्रीं खस नेपाली बाहेकया नेपाःया हे मेगू भासं सार्वजनिक ज्याझ्वलय् सम्बोधन यानादीगु थ्वहे न्हापांगु खुसिइ खः ।
नेपाल संवत् राष्ट्रिय न्हूदँ समारोह समितिं ग्वसाःग्वःगु ज्याझ्वलय् प्रधानमन्त्री भट्टराईं न्हापाया थीथी सरकारं नेपाल संवतयात कार्यान्वयन मयासां वर्तमान सरकारं धाःसा गम्भीर रुपं कार्यान्वयन यायेगु लक्ष्य काःगु धयादिल । वयकेलं नेपाल संवत् नेवाःतय् जक मखसें सकल नेपाःमितय् हे जूगु खँय् भ्रम मतयेत नं इनाप यानादिल ।
'नेपाल संवत् नेवाः जातिया जक संवत् मखु, थ्व संवत् नेपाःया ऐतिहासिक संवत् खः' वय्कलं धयादिल, 'थ्व खँय् सुयां नं भ्रम मजुइमाः ।'
नेपाःया थीथी आन्दोलन व संघर्षय् नेवाः जातिया गौरवपूर्ण भूमिका दुगु न्ह्यथनादिसें वय्कलं शान्ति प्रक्रिया व संविधान निर्माणयात निष्कर्षय् थ्यंकेत अहम भूमिका म्हितेत नं नेवाः समुदाययात इनाप यानादिल । वय्कलं नेवाःतय्सं ल्ह्वनाच्वंगु संघीयता, स्वशासन व स्वायत्तताया माग प्रति थः व थःगु पार्टी प्रतिबद्ध दुगु धयादिल ।
उगु ज्याझ्वलय् नेपालभाषा मंकाः खलया नायः पद्मरत्न तुलाधारं बहुदल व लोकतन्त्र वयेधुंकाः नं सरकारया भाषा नीतिइ विभेद जुयाच्वंगु धयादिल । अन्तरिम संविधानं नेपाःया फुक्कं भाय्यात राष्ट्र भाय् धकाः मन्यता बिइधुंकूगु अवस्थाय् सरकारं नेपाःमितय् थःथःगु मांभासं आखः ब्वनेगु नापंया अधिकार दुथ्याकाः भाषा नीति दयेकेत सरकारयात इनाप धयादिल ।
प्रधानमन्त्री भट्टराईं नेवाः भासं यानादीगु सम्बोधन लिपा भावुक जुयादीम्ह तुलाधरं प्रधानमन्त्रीयात आः तामाङतय् ज्याझ्वलय् वनेवलय् तामाङ भासं, गुरुङतय् ज्याझ्वलय् वनेवलय् गुरुङ भासं व मधेशय् वनेवलय् मधेशया हे भासं सम्बोधन यानादीत नं इनाप यानादिल ।
सभा स्वयां न्ह्यः येँया बसन्तपुलिं न्ह्याःगु सांस्कृतिक र्याली चकंदबुली वयाः क्वचायेकूगु खः । सभा जुयाच्वंगु इलय् ज्यापु समाजया प्रतिनिधित व ग्वसाः खलः दथुइ छुं ई तनावया अवस्था ब्वलंगु खः । ग्वसाः खलकं ज्यापु समाजया प्रतिनिधितय्त मञ्चय् मसःतुगु धासें समाजं सभा बहिष्कार याःगु खः ।
