नेपाल संवत् फुक्कं नेपाःमितय् संवत् : प्रम भट्टराई
प्रधानमन्त्री डा. बाबुराम भट्टराईं नेपाल संवत् फुक्क नेपाःमितय् संवत् जूगु खँय् बः बियादीगु दु ।
मध्यपुर थिमिइ शंखधर साख्वःया झ्वातालय् स्वां देछाय्त शंखधर साख्वाः प्रतिष्ठानं ग्वसाःग्वःगु ज्याझ्वलय् प्रधानमन्त्री भट्टराईं नेपाल संवत् नेपाःया मौलिक व राष्ट्रिय संवत् जूगुलिं थ्व नेवाःतय् जक मखु फुक्कं नेपाःमितय् हे संवत् जूगु धयादिल । न्हूदँया लसताय् बिहीवाः सुथय् छगू विज्ञप्ति मार्फत भिंतुना बिइगु झ्वलय् नं वय्कलं उगु खँ न्ह्यथनादीगु खः ।
वय्कलं सुनां देय्या इतिहासप्रति गौरव याइमखु व देशभक्त जुइमफइगु न्ह्यथनादिसें नेपाल संवत् झीगु राष्ट्रियतानाप स्वापु दुगु इतिहास जूगुलिं थ्व खँय् झीसं गौरव यायेमाःगु धयादिल ।
छुं न्हि जक मन्त्रिपरिषदया मुँज्यां नेपाल संवतयात व्यवहारिक रुपं छ्यलेत अध्ययन यायेत नीस्वंगु आयोगया बारे न्ह्यथनादिसें प्रधानमन्त्री भट्टराईं लच्छि-लत्याया दुने उगु आयोगं सुझाव बिइवं उकियात सरकारं याकन स्वयां याकनं कार्यान्वयन यायेगु प्रतिबद्धता प्वंकादिल ।
ज्याझ्वलय् इतिहासविद् जगदिशचन्द्र रेग्मीं नेपाःया मौलिक बाजं लगायत फुक्कं संस्कृति तनावनाच्वंगु धयादिसें मौलिक संस्कृति संरक्षण यायेत सरकारं अज्याःगु ज्या याइपिंत भत्ता लगायतया व्यवस्था यानाः प्रोत्सहान यायेमाःगु धयादिल ।
नेपालभाषा मंकाः खलया नायः पद्मरत्न तुलाधरं मानवअधिकार, नागरिक वा राजनीतिक अधिकारया विकास जुइ न्ह्यः हे ११३२दँ न्ह्यः शंखधरं लोककल्याणकारी ज्या यानाः राष्ट्रियता क्वातुइकेगु ज्या यानाः क्यंगु धयादिल ।
ज्याझ्वलय् नेपाली कांग्रेसया सभापति सुशील कोइराला, नेकपा (एमाले)या न्वकु अशोक राई, राष्ट्रिय प्रजातन्त्र पार्टीया नायः पशुपति शम्सेर जबरां प्रधानमन्त्री भट्टराई नेतृत्वया सरकारं नेपाल संवतयात व्यवहारिक रुपं छ्यलेगु निर्णय नापं सरकारी पात्रोय् न्ह्यथनेगु धकाः याःगु निर्णय प्रंशसनिय जूगु धयादिल ।
उगु हे ज्याझ्वलय् नेपाल संवत् आन्दोलनय् ताः ई न्ह्यः निसें योगदान बिउपिं नेपालभाषा मंकाः खलःया नायः पद्मरत्न तुलाधर व नेवाः देय् दबूया संरक्षक मल्ल के. सुन्दर व संस्थागत रुपय् थिमिया ल्याम्ह पुचःयात हंगु खः । सम्मानित जूपिंत प्रधानमन्त्रीं दसिपौ लःल्हानादीगु खः ।
अथेहे ज्याझ्वलय् प्रधानमन्त्री लगायत व्यक्तित्वतय्सं शंखधरया झ्वातय् स्वांमाः क्वखायेकूगु खः ।
