न्हापांगु पलाः हे ब्याक गियरय्
माओवादी सरकार लिपा वःगु माधव नेपालया सरकारं न्हूगु गति ज्वनाः न्ह्यःने ब्वाँय् वनेगु पलेसा 'ब्याक गियर’ तयाः लिउनेपाखे गति कायेत स्वःगु संकेत वःगु दु । म्हिगः च्वंगु '२२ दल’या बैठकय् वर्तमान सरकारया दकलय् तःधंगु घटक नेपाली कांग्रेसपाखें राज्य पुनस्रंरचना मन्त्रालय विघटन यायेमाःगु संविधानसभा मन्त्रालयया नां हिलेमाःगु आदि प्रस्ताव तःगु स्वयेबलय् प्रधानमन्त्री माधव नेपालया न्हापांगु पलाः हे ब्याक गियरय् लाः थें च्वं ।
देशय् संविधानसभाया चुनाव जूगु हे राज्य पुनस्रंरचना यानाः देय्यात न्हूगु स्वरुप बीगु निंतिं खः । उकियात आत्मसात यायेगु ल्याखं सरकारं राज्य पुनर्संरचना मन्त्रालय दयेकूगु खः । आः सत्ता थःगु ल्हातय् लायेसातकि उगु मन्त्रालय हे मदयेका छ्वयेगु धइगु देय्यात हानं पुलांगु हे संरचनाय् लित यंकेगु खः । अपाय्धंगु जनयुद्ध व जनआन्दोलन यानाः देशयात गुगु दिशापाखे न्ह्याकेगु ज्या जूगु खः आः अनं मुलुकयात लित हयेगु धइगु देशय् हानं छकः असन्तोष ब्वलंकाः अन्ततः मेगु विद्रोहया पुसा पीगु थें जक जुइ । उकिसनं विपक्षी माओवादीं छु खँयात ज्वंसा मि च्याके फइ धकाः भौमिखां मालाच्वंगु ला द हे दु । थज्याःगु खँयात वास्ता मयासे यदि सरकारं आम जनतायात निराश याइगु छुं नं निर्णय यात धाःसा उकिं देशयात गति लाःगु थासय् मयंकीगु निश्चित दु ।
थुकिया नापनापं न्हापांगु बैठकय् हे थथे पश्चगामी सुझावत न्ह्यःने हःगुलिं देशया बागडोर ज्वंपिं नेतातय्सं आः मुलुकयात न्हयःने यंकेगु ज्या याइ मखु ला धइगु शंका धाःसा पिकया बिउगु दु । आखिर दिन गज्याःगु जुइ धइगु संकेत ला सुथं हे बीगु मखा ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
