चर्चय् जूगु बिस्फोट प्रति धर्मोदय सभाया चिउताः

यें (सन्ध्या टाइम्स) / वंगु जेठ ९ गते सनिवाः कुन्हु यलया छगू चर्चय् जूगु बम बिस्फोट व निम्ह मनू सिगु घटना प्रति धर्मोदय सभां थःपिनि चिउताः प्वंकूगु दु ।

यलया एजम्प्सन चर्चय् उकुन्हु अज्ञात पुचलं बम मुइकुगु इलय् निम्ह सर्वसाधारण सीगु खःसा आपालं मनूत घाःपाः नं जूगु खः ।

शान्ति नायक गौतम बुद्धया जन्मभूमि झीगु देशय् शान्तिया पुनर्स्थापना जुइत्यंगु इलय् लाक हे शान्ति खलबल यायेगु दुस्प्रयास शुरु जूगु धर्मोदय सभां धाःगु दु ।

धर्मोदय सभाया महासचिव सुचित्रमान शाक्यं हस्ताक्षर सही याना पिथनातःगु प्रेस विज्ञप्तिइ धार्मिक सहिष्णुताया नमूना मुलुक कथं लानाच्वंगु झीगु देशय् थुकथंया शान्ति खलबल यायेगु ज्या सुं सुंपाखें गनं नं मजुइमाः धकाः कामना यानातःगु दु ।

सनिवाः ९:१५ बजे जूगु उगु घटनाय् निम्ह मनू सिगु व छुं मनू घाःपाः जूगु घटनां सभायात स्तब्ध याःगु खँ नं विज्ञप्तिइ न्ह्यथनातःगु दु । नापं उगु घटना प्रति सभां दुःख प्वंकागु दु धयातःगु दु ।