बिपा सम्झौता राष्ट्रहित अःखः मजूगु प्रधानमन्त्रीया दावी
प्रधानमन्त्री डा. बाबुराम भट्टराईं भारतलिसे जूगु निगू पक्षिय लगानी हित संरक्षण (बिपा) सम्झौता राष्ट्रहित अःखः मजूगु दावी यानादीगु दु ।
व्यवस्थापिका संसदया सोमवाः च्वंग मुँज्याय् न्ववानादिसें वय्कलं भारतलिसेया राजनीतिक, धार्मिक नापं सांस्कृतिक सम्वन्धयात ध्यानय् तयाः उगु सम्झौता याःगु प्रष्टिकरण बियादिल । थःम्हं यानागु भारत भ्रमणं निगू देय् दथुइया स्वापूयात विकसित यायेत महत्वपूर्ण योगदान जूगु विश्वास प्वंकादिसें वय्कलं संकिर्ण दल व गुटगत कोणपाखें कचवं पिमकायेत इनाप नापं यानादिल ।
वय्कलं नेपाःया आर्थिक सम्वृद्धिया हितया निंतिं गुगु प्रक्रिया छ्यलेबलय् पाय्छि जुइ वहे यायेमाःगुलिं थःम्हं भारतलिसेया स्वापूयात तब्याकःगु दाबी नापं यानादिल ।। बिपा सम्झौतां आर्थिक हित प्रबद्धन यायेत ग्वाहालि याइगु धयादिल । वय्कलं भ्रमणया झ्वलय् भारतलिसे थःम्हं सिमा क्षेत्रय् जुयाच्वंगु समस्या ज्यंकेत बः बियाःगु व सिमा क्षेत्रय् भन्सारयात सुदृढ यायेत, सुस्ता व कालापानीया नक्साङ्कन यायेत नं ध्यानाकर्षण यानागु जानकारी बियादिल ।
भारतया थीथी अदालतय् दुपिं नेपाःया राजनीतिःकर्मितय् मुद्दा लित कायेगु विषय व दशगजा अतिक्रमणया विषयलय् नं थःम्हं भारत भ्रमण झ्वलय् सहलह यानागु खँ प्रधानमन्त्री भट्टराईं संसदयात जानकारी बियादिल । निगू देय् दथुइ विद्युत व्यापारया विषयलय् सहलह जूगु व चिकुलया इलय् लोडसेडिङ जुइगु खँयत ध्यानय् तसें निसः मेगावाट विद्युत हयेगु विषयलय् नं भारतलिसे सहलह जूगु खँ प्रधानमन्त्रीं धयादिल ।
प्रधानमन्त्री भटराईं बिपा सम्झौता राष्ट्रया हे हितया निंतिं याःगु स्पष्टिकरण बिउसां नं प्रतिपक्षी दलया नेतातय्सं सम्झौता राष्ट्रया हितय् मदुगु धासें प्रधानमन्त्रीया कुंखिनेगु ज्या यात । संसदया मुँज्यय् न्ववानादिसें नेपाली कांग्रेसया नेता डा. रामशरण महतं पहाड म्हुइबलय् छुं लुयावथें प्रधानमन्त्रीया भारत भ्रमण उपलव्धी शुन्य जूगु धयादिल ।
नेकपा एकीकृतया परि थापां देय्यात ऋण क्वबुइकूगु खँय् गर्व यायेगु परम्परा प्रधानमन्त्री बाबुरामं नं कायम हे तःगु धयादिल । राष्ट्रिय जनशक्ति पार्टीया ल्यू नायः प्रकाशचन्द्र लोहनीं बिपा सम्झौतां लगानीया खुसिइ न्ह्याइ धइगु खँ गलत जूगु धयादिल । अथेहे संसदया मुँज्याया विशेष इलय् सभासद्त नवराज दाहाल, सन्त नेपाली, प्रदीप ज्ञवाली लगायतं प्रधानमन्त्रीया भारत भ्रमण उपलब्धीहिन जूगु दावी याःगु खः ।
