विषयगत समितिया सभापतितय्सं संविधान निर्माणयात गति बिइत माग
संविधानसभा अन्तर्गतया थीथी झिंप्यंगू विषयगत समितिया सभापतितय्सं अवरुद्ध अवस्थाय् दुगु संविधान निर्माणया ज्यायात गति बिइत सर्वदलीय मुँज्या आव्हान यायेत माग याःगु दु ।
संवैधानिक समितिया सचिवालय सिंहदरवारय् सोमवाः च्वंगु मुँज्यां संविधान निर्माणयात गति बिइत सर्वदलीय मुँज्या नापं संवैधानिक समितिया मुँज्या नियमित रूप च्वनेत नं माग याःगु दु । मुँज्या लिपा राष्ट्रिय हितया संरक्षण समितिया सभापति अमिक शेरचनं संविधान च्वयेगु ज्यायात तीव्रता बिइगु निंतिं थज्यागु निर्णय याःगु धयादिल ।
मुँज्यां संविधानसभाया मुँज्या सतेमागु, संविधान निर्माण प्रक्रियाय् आतक्क जूगु ज्याया बारे जनतायात सार्वजनिक रुपय् जानकारी बिइमाःगु लिसें कात्तिक मसान्त न्ह्य हे संविधानया न्हापांगु एकीकृत मस्यौदा सार्वजनिक यायेमाःगु लगायतया निर्णय नं सोमवाः च्वंगु मुँज्यां यात । मुँज्या लिपा समितिया सभापतितय्सं थुगु बिषयलय् संविधानसभाया नायः सुभाषचन्द्र नेम्वाङलिसे वय्कःया कार्यकक्ष सिंहदरबारय् सहलह याःगु खः । अथेहे सभापतितय्सं राजनीतिक दलया शीर्ष नेतातय्त नापलाना संविधान निर्माणय् गम्भीरतापूर्वक वनेत इनाप यायेगु खँ क्वःछिउगु दु ।
