अमेरिकी निर्णय नेपाःयात घाटक
यें (सन्ध्या टाइम्स) / अमेरिकां थः नागरिकतय्त नेपाः भ्रमण यायेगु इलय् उच्च सतर्कता नालेत बिउगु 'ट्राभल एड्भाइजरीं' नेपाःयात बांमलाःगु लिच्वः लायेफइगु खँ पर्यटनविद्तय्सं धाःगु दु ।
माओवादीं सरकार त्वःतेधुंकाः अमेरिकी विदेश मन्त्रालयं थः नागरिकतय् निंतिं 'ट्राभल एडभाइजरी' जारी याःगु खः । उगु एडभाइजरी सरकार त्वःतेधुंकाः माओवादीं हाकनं हिंसात्मक राजनीतिइ वनेफुगु व बन्द हडताल थेंजाःगु गतिविधि जुफुइगु धासें अत्यावश्यक ज्या मदयेकं नेपाःया भ्रमण मयायेत नं थः नागरिकतय्त इनाप याःगु दु ।
अमेरिकाया थ्व इनाप लिपा सरकारं सन २०११य् यायेगु धकाः घोषणा यानातःगु नेपाल भ्रमण वर्ष व नेपाःया पर्यटन उद्योगय् गम्भीर लिच्वः लाइगु संकेत पिहां वःगु नं धाःगु दु ।
नेपाःया पर्यटन उद्योगय् अमेरिकी पर्यटकतय्त आकर्षक ग्राहक कथं कायेगु याः । अमेरिकी पर्यटकत ताः ई तक नेपालय् च्वनेगु व अप्वः दां खर्च याईपं जुयाः नं उमित गुणस्तरीय पर्यटक कथं पर्यटन व्यवसायीतय्सं कायेगु याः ।
माओवादीं नेपालय् सशस्त्र द्वन्द्व न्ह्याकाच्वंगु इलय् नं अमेरिकां थज्याःगु एडभाइजरी जारी यानाः थः नागरिकतय्त सतर्क याःगु खः ।
तर छुं पर्यटन व्यवसायीतय्सं धाःसा अमेरिकी सरकारया थ्व एडभाइजरीं नेपाःया पर्यटन व्यवसाययात लिच्वः मलाइगु खँ धाःगु दु ।
नेपालय् आः सशस्त्र आन्दोलन दीधुंकूगु व थौंकन्हय् न्हापा न्हापा थें पर्यटनतय्त गनं नं पंगः थनेगु ज्या मजुगुलिं थुकिं पर्यटन व्यवसाययात लिच्वः मलाइगु खँ नं धाःगु दु ।
'नेपाःया स्थिति न्हापा थें मखु आः पर्यटकतय्त दुःख बीगु ज्या सुनां नं मयागुलिं यानाः अमेरिकी पर्यटन म्हो जुइ धइगु खँ हौवा जक खः ।' अमेरिकी सरकारं अझ नं माओवादीयात आतंककारीया धलखं मचीकूनी ।
