बिपा लितमकासाः सतक व सदय् संघर्ष : बादल
एकीकृत नेकपा (माओवादी)या मू छ्याञ्जे रामबहादुर थापा 'बादलं' प्रधानमन्त्री बाबुराम भट्टराईं मजदुरतय्गु अधिकार लाका काइगु निगू पक्षिय लगानी प्रवर्द्धन एवं संरक्षण (बिपा) सम्झौता यानाः भारतप्रेम क्यंगु द्वपं बियादीगु दु ।
वय्कलं संसदवादी दलत कांग्रेस व एमालें नापं राष्ट्रघातीया द्वपं फयेमाःगु कारण थ्व स्वयां न्ह्यः बिपा सम्झौता यायेमफुगु धयादिल । पार्टी कार्यकर्ता नापलायेगु निंतिं बाँकेया कोहलपुर थ्यंकादीम्ह बादलं क्रान्तिकारी पत्रकार संघ बाँकें याःगु पत्रकार सम्मेलनय् न्ववानादिसें राष्ट्रिय हित विरोधी सम्झौता यानाः भट्टराईं नेपालय् भारतया प्रभुत्व अप्वयेकेगु ज्या याःगु दाबी यानादिल ।
बादलं भारतयात औपचारिक पौ छ्वयाः सम्झौता याकनं खारेज मयासा सतक व सदनपाखें आन्दोलन न्ह्याकीगु ख्याच्वः बियादिल । वय्कलं सम्झौता खारेज मजुतले राष्ट्रिय स्वाधिनताया पक्षय् आन्दोलन न्ह्याका च्वनेगु अडान नं कयादिल ।
