राज्य पुनर्संरचना मन्त्रालय छाय् खारेज
यें (सन्ध्या टाइम्स) / माओवादी नेतृत्वया सरकारय् गठन यानातःगु संस्कृति तथा राज्य पुनर्संरचना मन्त्रालयपाखें 'राज्य पुनर्संरचना' लिकया छ्वयेगु धकाः सरकारं यायेत्यंगु निर्णयं देय्या आदिवासी जनजातित तम्वइगु खतरा पिहां वःगु दु । स्वयम् एमालेया हे केन्द्रीय दुजः राजेन्द्र श्रेष्ठं समेत सरकारया थ्व निर्णयया विरोध यानादीगु दु ।
यदि राज्य पुनर्संरचना मन्त्रालय हटे यायेगु खःसा उकिया थासय् जातीय मामिला मन्त्रालय गठन यायेमाः धइगु नं वय्कःया सुझाव दु । एमालेया घोषणापत्रय् जातीय मामिला मन्त्रालय गठन यायेगु खँ नं उल्लेख जुयाच्वंगु खँ वय्कलं कनादिल ।
देशय् राज्य पुनर्संरचना आयोग गठनया तयारी जुयाच्वंगु कारणं राज्य पुनर्संरचना मन्त्रालय आवश्यक मदु धइगु तर्क कांग्रेस नेतातय्गु दु । तर थ्व तर्कयात माने यायेगु खःसा महिला मन्त्रालय व खेलकुद मन्त्रालय नं आवश्यक मजुइफु छाय्धाःसां देशय् महिला आयोग व खेलकुद परिषद् धइगु नं बिस्कं निकाय दु । देशय् राज्य पुनर्संरचना बारे थपाय्धंगु वहस जुयाच्वंगु इलय् सरकार थ्वपाखें बिस्कं च्वनेगु पाय्छि जुइ मखु । राज्य पुनर्संरचना मन्त्रालय वा जातीय मामिला मन्त्रालय गठन यानाः आः दुगु दलित आयोग आदिवासी जनजाति राष्ट्रिय प्रतिष्ठान गुम्बा व्यवस्थापन समिति पिछडावर्ग उत्थान समिति थेंज्याःगु निकाययात थ्व अन्तर्गत तयाः ज्या यायेफु धइगु नं विज्ञतय् सुझाव दु ।
सरकारं राज्य पुनर्संरचना मन्त्रालय खारेज यात धाःसा थ्व पुलांगु हे ब्राम्हणवादी सोचया लिच्वः जुइगु खँय् शंका मदु ।
