नेपाः व भारत दथुइया स्वापुतिइ न्हूगु आयाम : प्रधानमन्त्री भट्टराई
प्रधानमन्त्री डा. बाबुराम भट्टराईं थःगु भारत भ्रमणं नेपाः व भारत दथुइया स्वापुतिइ न्हूगु आयाम दयेकूगु दावी यानादीगु दु ।
थःगु प्यन्हुन्यंकया भारत भ्रमण क्वचायेकाः आइतवाः येँ थ्यंकादीम्ह प्रधानमन्त्रीं त्रिभुवन अन्तर्राष्ट्रिय विमानस्थलय् पत्रकारतनाप खँल्हाबंला यानादिसें नेपाः व भारतया स्वापुतिइ न्हूगु आयाम दयेकूगुलिं थःगु भ्रमण सफल जूगु धयादिल । वय्कलं निगू देय् दथुइ छगू बल्लागु व विश्वास यायेबहः जूगु आधार नं तयार जूगु न्ह्यथनादिल ।
अथेहे वय्कलं निगू पक्षिय लगानी प्रवर्द्धन एवं संरक्षण (बिपा) राष्ट्रिय हितयात ध्यानय् तयाः याःगु सम्झौता जूगुलिं उगु सम्झौता राष्ट्र हितय् हे दुगु धयादिल । वय्कलं भारतया कम्पनीतय्सं नेपालय् लागानी याइगु इलय् सामान्य हड्ताल 'सिभिल डिस्ट्रवेन्स'य् क्षतिपूर्ति बिइम्वाःगु नं स्पष्ट यानादिल ।
थ्वहे दथुइ प्रधानमन्त्री भट्टराई थःगु प्यन्हुया औपचारिक भारत भ्रमणया लिपांगु दिं आइतवाः उत्तराखण्डया उत्तराञ्चल प्रदेश थ्यंकादीगु खः । हैदरावादस्थित थीथी उद्योग प्रतिष्ठानया अवलोकन यायेगु ज्याझ्वः कथं आइतवाः सुथय् एयर इण्डियाया विशेष विमानपाखें हरिद्वार विमानस्थल थ्यंकूगु इलय् वय्कःयात भारतया पर्यटन लिसे उप विकासमन्त्री आलोक जैनं लसकुस याःगु खः ।
प्रधानमन्त्री भट्टराई स्वीन्ह्यम्ह दुजः दुगु पुचःया नेतृत्व यासें बिहीवाः प्यन्हुया भारत भ्रमणय् झायादीगु खः । प्रधानमन्त्री भट्टराईया भारत भ्रमणया झ्वलय् निगू पक्षिय लगानी प्रवद्धन एवं संरक्षण (बिपा) लिसे स्वंगू ब्यागलं ब्यागलं सम्झौताय् ल्हाःचिं तयेगु ज्या जूगु खः ।
वैद्यपक्षपाखें हाकुगु ध्वाँय्
प्यन्हुन्यंकया भारत भ्रमण लिपा आइतवाः येँ लिहांझायादीम्ह प्रधानमन्त्री भट्टराईयात थःगु हे पार्टीया मोहन वैद्य पक्षया कार्यकर्तातय्सं हाकुगु ध्वाँय् क्यंगु दु । त्रिभुवन अन्तर्राष्ट्रिय विमानस्थल पिने हे वैद्य पक्षया कार्यकर्तात मुनाः हाकुगु ध्वाँय् क्यनेगु नापं वय्कःया राजीनामा तकं फ्वंगु खः । वैद्य पक्ष समर्थित झिंन्यागू जनवर्गीय संगठनं बिपा सम्झौता राष्ट्रघाती जूगु ठहर याःगु खः । हाकुगु ध्वाँय् क्यनीगु इलय् कार्यकर्तातय् उपस्थिति दुगु खःसां वैद्य पक्षया सुंनं नेतातय् धाःसा उपस्थित मजू ।
