चितवनय् शिक्षकतय्सं निजी विद्यालय बन्द
चितवनय् प्याब्सन अन्तर्गतया विद्यालयसं ज्या यानाच्वंपिं शिक्षकतय्सं आइतवाः चितवनया फुक्क निजी विद्यालय बन्द याःगु दु । न्हापा याःगु थीथी सहमति कार्यान्वयन मजूगु व सरकारं वृद्धि याःगु तलब भत्ता कथंया सेवा सुविधा उपलब्ध मयाकूगु धासें शिक्षकत आन्दोलित जूगु ख । बन्दया कारण चितवनया विद्यार्थीत प्रभावित जुल । उगु विषयलय् न्हापा याःगु सहमति कार्यान्वयन मजूगु धासें आन्दोलनया ज्याझ्वः घोषणा यायेमाःगु खँ संस्थागत विद्यालय शिक्षक युनियन इष्टु चितवनया नायः केशव पाठकं धयादिल । उमिसं थीथी प्यंगु बुँदे माग तयाः आन्दोलनया ज्याझ्वः नापं घोषणा याःगु दु । आन्दोलनकारी शिक्षकतय्सं वइगु १४गते तकया दुने नं थःपिनिगु माग पूमवंसाः अनिश्चितकालीन निजी विद्यालय बन्द यायेगु ख्याच्वः बिउगु दु ।
