माल धाःसा बली बीफु : मल्ल
ख्वप (सन्ध्या टाइम्स) / नेवाः देय् दबूया पुलांम्ह नायः व नेवाः स्वायत्त राज्य मंकाः संघर्ष समितिया दुजः मल्ल के. सुन्दरं माल धाःसा नेवाःत बलिदान बीत तकं लिचिलीपिं जाति मखु धयादीगु दु । म्हिगः थनया सूर्यमढीइ नेवाः स्वायत्त राज्य मंकाः संघर्ष समिति ख्वपया ग्वसालय् जूगु नेपालमण्डल बन्द प्रचारात्मक सभाय् वय्कलं उगु खँ कनादीगु खः ।
बन्द ज्याझ्वः न्हाय्पं मताःम्ह सरकारयात गसुलिं सुइगु सरह खः धयादिसें वय्कलं यदि बन्द लिपा नं माग प्रति वास्ता मयात धाःसा नेवाःत टायर च्याकेत नं लिचिलीमखु व बली बीत नं तयार जुइ धयादिल । ज्याझ्वलय् नेवाः स्वायत्त राज्य मंकाः संघर्ष समितिया नायः हितमान शाक्य नरेन्द्रभक्त हाडा सभासद् बुद्ध साय्मि सभासद उमा कपाली त्रिरत्न शाक्य व सभाया नायः हिरण्यलाल सांगामीपिंसं न्ववानादीगु खः ।
