महत्वपूर्ण खँय् प्रचण्डया सुझाव काये : नेपाल
यें (सन्ध्या टाइम्स) / महत्वपूर्ण विषयय् माओवादीलिसे सहलह यानाः जक निर्णय यायेगु खँ प्रधानमन्त्री माधव नेपालं धयादीगु दु । थौं सुथय् माओवादीं संसदय् दर्ता यानातःगु संकल्प प्रस्ताव बारे सहलह यायेत प्रम निवास बालुवाटार झाःम्ह सभामुख सुभाष नेम्वाङ्गलिसे खँ ल्हासें प्रम नेपालं उगु खँ धयादीगु खः । उगु खँल्हाबल्हाया झ्वलय् सभामुख नेम्बाङ्गं राजनीतिक पार्टीतय् दथुइ ब्वलनाच्वंगु विवादया कारणं संविधान दयेकेगु ज्याय् पंगः वयाच्वंगुिलं प्रधानमन्त्रीया ध्यानाकर्षण याःगु खः । सभामुख नेम्वाङ्गं थौं हे कांग्रेस सभापति गिरिजाप्रसाद कोइराला व माओवादी अध्यक्ष पुष्पकमल दाहाल 'प्रचण्ड'लिसे नं थ्व बारे सहलह यानादीगु ज्याझ्वः दु ।
