प्रधानमन्त्रीया भारत भ्रमण : बिपा लगायत स्वंगू सम्झौताय् ल्हाःचिं
प्रधानमन्त्री डा. बाबुराम भट्टराईया भारत भ्रमणया झ्वलय् शुक्रवाः लगानी सुरक्षा सम्झौता 'बिपा' लगायत स्वंगू विषयलय् सम्झौता जूगु दु । बिपा नापं लाइन अफ क्रेडिट (सहुलियत दरया ऋण) व गलगाँड नियन्त्रण सम्बन्धी सम्झौता जूगु दु ।
नेपालय् प्यसः निसें खुसः चीधंगु व तःधंगु उद्योगय् भारतीय लगानी दुगुलिं भारतं वंगु स्वंगू दशकनिसें थुगु सम्झौताय् ल्हाःचिं तयेत नेपाःया हरेक प्रधानमन्त्रीयात दवाब बियावयाच्वंगु खः । बिपा सम्झौतालिपा नेपालय् भारतीय लगानी अप्वयेकेत लकस तयार जुइगु भारतीय पक्षया विश्वास दु ।
प्रधानमन्त्री भट्टराईया भारत भ्रमणया निन्हुया न्हि भारतया समकक्षी डा. मनमोहन सिंहया उपस्थितिइ हैदरावाद हाउसय् निगूलिं देय्या सम्बन्धित अधिकारीतय्सं स्वंगू विषयलय् ल्हाःचिं तःगु खः । बिपाय् भारतपाखें अर्थमन्त्री प्रणव मुखर्जी व नेपाःपाखें उद्योगमन्त्री अनिलकुमार झा, सहुलियत दरया ऋण सम्झौताय् भारतया आयात-निर्यात बैंकया अध्यक्ष टीसीए रंगनाथन व नेपाःपाखें अर्थ मन्त्रालयया सहसचिव लालशंकर घिमिरे व स्वंगूगु सम्झौताय् भारतपाखें विदेशसचिव रञ्जन मठाई व नेपाःपाखें आपूर्तिसचिव पुरुषोत्तम ओझां ल्हाःचिं तयादीगु खः ।
सहुलियत दरया ऋण अन्तर्गत भारतं नेपाःयात २५ करोड अमेरिकी डलरया सहुलियत दरया ऋण उपलब्ध याइ । उकियात नेपालं पुल, विमानस्थल, सडक, जलविद्युत् लगायत आयोजना निर्माणय् खर्च याइ ।
अथेहे प्रधानमन्त्री भट्टराईं भ्रमणया झ्वलय् निख्यरं कर प्रणाली अन्त्यया प्रस्ताव नं भारत दथुइ न्ह्यब्वःगु खःसं भारतं उकिया बारे आन्तरिक सहलह यायेमानि धकाः स्थगित याःगु दु ।
