सरकार प्रतिगमन पाखे : माओवादी
माओवादी सरकारं याःगु निर्णयत हिकाः माधवकुमार नेपालं नेतृत्व याःगु सरकार प्रतिगमन पाखें न्ह्याः वनाच्वंगु खँ माओवादीं धाःगु दु ।
माओवादी सचिवालयया बिहिवाः च्वंगु बैठकं न्हूगु सरकारया निर्णय अधिनायवादी व अनैतिक जूगु टिप्पणी याःगु दु । न्हूगु सरकारं राज्य पुर्नसंरचना मन्त्रालय खारेज यानाः आयोग देयेकेगु व संविधानसभा मन्त्रालय यात संसदीय व्यवस्था मन्त्रालय देयेकेगु तयारी यानाच्वंगु दु ।
नागरिक सर्वोच्चता विरुद्ध अपूर्ण मन्त्रिपरिषदं थंज्याःगु निर्णय यानाः सरकारं अधिनायवादी चरित्र क्यंगु खँ माओवादी प्रवक्ता दिनानाथ शर्मा धयादिल । बैठकं कांग्रेस व एमालेया एजेण्डा संविधानसभा व गणतन्त्र हे मजूगुलिं उगु दलत व माओवादीया लँपू पाःगु ठहर याःगु दु ।
थौंया बैठकय् संविधान निर्माणय् पार्टीया भूमिका व पोलिटब्यूरो बैठकया निंतिं एजेण्डाया बारे नं सहलह जूगु खः ।
