नेपाल संवतयात न्हूगु संविधानय् दुथ्याकेत प्रतिष्ठानया माग
राष्ट्रिय विभूति शंखधर प्रतिष्ठानं नेपाल संवतयात न्हूगु संविधानय् दुथ्याकेत व सरकारी कामकाजय् नापं छ्यलाबुलाय् हयेत माग याःगु दु ।
प्रतिष्ठानं बिहिवाः छगू पत्रकार सम्मेलन यानाः नेपाल सम्वत् देय्या ऐतिहासिक व मौलिक लिसे राष्ट्रिय संवत् जूगु धासें सरकारी कामकाजय् हयेत माग याःगु खः । प्रतिष्ठानं राज्यं थुकिया संरक्षण, सम्बद्धन व प्रवद्धनय् ठोस योगदान यायेगु ज्याझ्व हयेत सरकारलिसे इनाप याःगु दु । प्रतिष्ठानया नाय श्यामकृष्ण मानन्धरं सरकारं राष्ट्रिय संवत् बारे आःतक छु नं कथंया नीति व ज्याझ्व महःगु खँय् चिउताः प्वंकादिल ।
नेपाल संवतया प्रवर्तक राष्ट्रिय विभूति शंखधर साख्वालं राष्ट्रियताया भावनापाखें अभिप्रेरित जुयाः ऋणमोचनया निंतिं निर्वाह याःगु भूमिका लिसे ने.सं. न्ह्याकेत म्हितूगु महत्वपूर्ण योगदानयात लुमंका २०५८ मङ्सिर २ गते 'ने.सं. ११२२ कछलाथ्व दशमी'या दिं साख्वाःयात राष्ट्रिय विभूति घोषणा याःगु खः । अथेहे तत्कालीन प्रधानमन्त्री पुष्पकमल दाहालं २०६५ साल कात्तिक ७ गते नेपाल संवतयात राष्ट्रिय सम्वत् घोषणा याःगु खः । तर नं उगु संवत् सरकारी कामकाजय् वयेफूगु मदुनि ।
