प्रधानमन्त्री डा. बाबुराम भट्टराई दिल्लीइ
प्रधानमन्त्री डा. बाबुराम भट्टराई बिहिवाः स्वीन्हय्म्ह दुजः दुगु जम्बो पुचःया नेतृत्व यानाः प्यन्हुया औपचारिक भारत भ्रमणय् झायादीगु दु । प्रधानमन्त्री बिहिवाः हे न्हिनय् निताः इलय् दिल्लीस्थित इन्दिरा गान्धी अन्तर्राष्ट्रिय विमानस्थल थ्यंकादीगु खः । प्रधानमन्त्री भट्टराई न्हिनय् झिंनिताः इलय् नेपाल वायुसेवा निगमया विमानपाखें न्हू दिल्ली झायादीगु खः ।
उगु हे लसताय् वय्कःयात भारतया विदेश मन्त्रालयया ल्यू छ्याञ्जे लिसे दिल्लीस्थित नेपाली दुतावासया कार्यवाहक राजदुत खगनाथ अधिकारी लगायतं लसकुस याःगु खः । अनं वय्कः चाणक्यपुरीस्थित होटल लीला प्यालेस झायादीगु खः । प्रधानमन्त्रीया नीजि सचिवालयं ब्यूगु जानकारी कथं होटल लिलाय् हे भट्टराईं थम्हं अध्ययन याःगु जवाहरलाल नेहरु विश्वविद्यालयया पुलांपिं पासापिंलिसे नापलानादीगु खः ।
नापलाय् ज्याधुंका प्रधानमन्त्री भट्टराईं नागरिक समाजयापाखें साउथ एसिया फोरम फर पिपल्स् इनिसिएटिभं संवैधानिक क्लबय् याःगु लसकुस ज्याझ्वलय् ब्वति कयादीगु खः । बिहिवाः हे वय्कलं नेपाल डेमोक्रेसी सोलिडारिटी कमिटीं याइगु ज्याझ्वलय् नं ब्वति कयादीगु खः ।
प्रधानमन्त्री भट्टराईया महत्वपूर्ण नापलाय् ज्या धाःसा शुक्रवाः निसें जक न्ह्याइगु खँ दिल्लीस्थित नेपाःया दुतावासं धाःगु दु । भारत भ्रमणय् दुगु इलय् प्रधानमन्त्री भट्टराईं भारतया राष्ट्रपति प्रतिभादेवी सिंह पाटील, थः समकक्षी मनमोहन सिंह, काग्रेस आईया नकिं सोनिया गान्धी लगायतलिसे निगू पक्षीय हितया बारे सहलह यायेगु ज्याझ्वः दु । प्रधानमन्त्री भट्टराईया भारत भ्रमण आर्थिक एजेण्डाय् केन्द्रित जुइगु धाःगु दु ।
थ्व स्वयां न्ह्यः त्रिभुवन अन्तर्राष्ट्रिय विमानस्थलया अतिविशिष्ट कक्षय् साचारकर्मीयात चिहाकलं प्रतिक्रिया बियादिसें प्रधानमन्त्री भट्टराईं थ्व थःगु सद्भावना भ्रमण जूगुलिं भ्रमणया झ्वलय् निगू देय्या स्वापू सुमधुर दयेकेगु कुतः जुइगु धयादीगु खः । प्रधानमन्त्री भट्टराईया बिदाइया निंतिं विमानस्थलय् सभामुख सुभाषचन्द्र नेम्बाङ, उपप्रधानमन्त्री लिसे गृहमन्त्री विजयकुमार गच्छदार, मन्त्रीगण उच्चपदस्थ सरकारी अधिकृत लगायत मेमेपिं विशिष्ट व्यक्तिपिनिगु ब्वति दुगु खः । उगु हे लसताय् प्रधानमन्त्रीया सम्मानय् नेपाली सेनाया टुकडीं सलामी अर्पण याःगु खः ।
भारत भ्रमणय् प्रधानमन्त्री लिसे वय्कःया जहान हिसीला यमी, परराष्ट्रमन्त्री नारायणकाजी श्रेष्ठ, अर्थमन्त्री बर्षमान पुन, प्रधानमन्त्रीया राजनीतिक सल्लाहकार देवेन्द्र पौडेल लगायतपिं दुथ्याः ।
