एमाले व कांग्रेस दथुइ कन्हय् तक मन्त्रिपरिषद विस्तार यायेगु सहमित
कांग्रेस व फोरमय् सरकारया नेतृत्व यायेगु खँ विवाद
सरकारया नेतृत्व यानाच्वंगु नेकपा (एमाले) व नेपाली कांग्रेसया दथुइ कन्हय् तक मन्त्रिपरिषद विस्तार यायेगु सहमति जूगु दु ।
प्रधानमन्त्री निवास बालुवाटारय् निगू दलया नेतात दथुइ जूगु खँल्हाबंलाय् थौं सनिलय् तक मन्त्रालयया बाँडफाँड यायेगु व कन्हय् मन्त्रिपरिषद बिस्तार यायेगु खँय् सहमति जूगु खँ प्रधानमन्त्रीया प्रमुख सल्लाकार रघुजी पन्त जानकारी बियादिल ।
थ्वहे दथुइ कांग्रेस व मधेशी जनअधिकार फोरमं सरकारय् थःगु पार्टीया नेतृत्व सुनां याइगु धइगु खँय् विवाद जुयाच्वंगु दु । कांग्रेस सभापति गिरिजाप्रसाद कोइरालां सरकारय् थःगु पार्टी पाखें नेता रामचन्द्र पौडेलया नेतृत्व थः म्हाय् सुजाता कोइरालायात नं छवेयेगु कुतः यानाःच्वंगु दु । तर कांग्रेसया कार्यवहाक सभापति सुशिल कोइराला व वरिष्ठ नेता शेरबहादुर देउवां धासाः थुकी असहमति प्वंकूगु दु ।
अथेहे फोरम अध्यक्ष उपेन्द्र यादव व संसदीय दलया नेता विजयकुमार गच्छदार दथुइ सरकारय् पार्टीया नेतृत्व सुनां याइगु धइगु खँय् विवाद जूगु दु । अध्यक्ष यादव पार्टी सहअध्यक्ष जयप्रकास गुप्ताया नेतृत्व सरकारय् ब्वति कायेमाःगु पक्षय् दुसाः नेता गच्छदार थःगु हे नेतृत्वय् सरकारय् वनेमाःगु पक्षय् दु ।
