हिउँदे अधिवेशन क्वचायेकेगु निंतिं प्रधानमन्त्री-सभामुख खँल्हाबंला
व्यवस्थापिका संसदया विधेयक अधिवेशन क्वचायेकेगु निंतिं सभामुख सुवाषचन्द्र नेम्वाङं राजनीतिक भेटघाटया ज्यायात तीव्रता बियादीगु दु । थ्वहे झ्वलय् बिहिवाः सुथय् वयेकलं प्रधानमन्त्री माधवकुमार नेपाल यात नापलानादीगु दु ।
सरकारयात समर्थन याइगु झिंन्ह्यगू दलया बैठक व मन्त्रीपरिषया बुधवाः च्वंगु बैठकं बजेट अधिवेशनया तयारी यायेमाःगुलिं हिउँदे अधिवेशनया अन्तय याकनं यायेमाःगु निर्णय याःगु खः ।
थ्वहे झ्वलय् थौं सुथय् हिँउदे अधिवेशन क्वचायेकेगु खँय् प्रधानमन्त्री नेपाल व सभामुख नेम्वाङ दथुइ जूगु खँल्हाबंलाय् प्रधानमन्त्री नेपालं सहमतिया आधारय् हिँउदे अधिवेशन क्वचायेकेत सभामुख यात इनाप यानादीगु खः । सहमतिया निंतिं थीथी दलया नेतात नाप सभामुख नेम्वाङं थौं हे खँल्हाबंला यानदीत्यंगु दु ।
खँल्हाबंलाय् सभामुख नेम्वाङ लिप्पांगु राजनीति घटनाक्रमय् च्यूता प्वंकादीसें थुकीयात सहमति यानाः ज्यंकेत प्रधानमन्त्रीयात सुझाव बियादीगु खः । लिसःलय् प्रधानमन्त्री नेपालं सरकारं माओवादी नापं नं सहमति व सहकार्य यानाः थःगु पलाः ल्ह्वनीगु खँ धयादिल ।
थ्वहे दथुइ थौं हे सभामुख नेम्वाङं नेपाली कांग्रेसया सभापति गिरिजाप्रसाद कोइराला व एकीकृत नेकपा (माओवादी)या अध्यक्ष पुष्पकमल दाहाल प्रचण्डयात नं नापलाना: हिँउदे अधिवेशन क्वचायेकेगु बारे खँल्हाबंला यानादीगु दु ।
